Лінкі ўнівэрсальнага доступу

Палітвязень Андрэй Скурко ў лістах зь СІЗА пра падзеі ў Беларусі: «Мёртвае адмірае, а жывое трансфармуецца»


Андрэй Скурко

На 17 студзеня ў Беларусі палітвязьнямі прызнаныя 984 чалавекі.

Паліна Скурко, жонка кіраўніка аддзелу маркетынгу «Нашай нівы» Андрэя Скурко, у Facebook падзялілася ўрыўкамі зь сьнежаньскіх лістоў ад мужа.

Што напісаў палітзьняволены:

Ведаю, што многія добрыя людзі цяпер вымушаныя шукаць новую працу.

Мне здаецца, адна з каштоўнасьцяў, якую можна вынесьці з гэтай сытуацыі — мёртвае адмірае, а жывое трансфармуецца і працягвае жыць.

Хоць у кароткатэрміновай пэрспэктыве гэта, канечне, выклікае нязручнасьці і часам пакуты.

Іх гісторыя нагадала выпадак зь Міхасём Міхайлавічам Чарняўскім (выдатны беларускі гісторык, якога ў 1970-я на некалькі гадоў з палітычных матывах звольнілі. – РС), якога некалі таксама звольнілі з Акадэміі навук, а празь некалькі год усё стала на месцы.


* * *

На гэтым тыдні ў нас нейкі час быў тэлевізар – даўно забытыя ўражаньні… Я быў вельмі рады, калі зноў забралі:)

Уразіла, што за тыя некалькі месяцаў, якія тэлевізара не было, не зьмяніўся (і не абнавіўся) нават плэй-ліст у ранішніх шоў. Хоць агулам, здаецца, нэрвознасьці паменела ў параўнаньні зь летам-пачаткам восені.

* * *

Раптам зразумеў, што не трымаю зла ні на кога з тых, каму трэба «дзякаваць» за сёньняшняе. Павер, яны і цяпер перажываюць пекла, і пасьля зь ім застануцца, калі для нас ужо ўсё скончыцца.

* * *

...Ня тое што траўмы — страшна сказаць, але ў мяне, здаецца, нават стрэсу няма:) Я цьвёрда ведаю, што ні ў чым не вінаваты, а знаходжуся тут, як і многія іншыя, проста таму, што час такі.

* * *

...У выпадку Напалеона — перамога над ім была б немагчымай без самаахвярнай барацьбы. У Гішпаніі літаральна ўвесь народ падняўся супраць францускіх захопнікаў, што змусіла Напалеона трымаць там вялікае войска, расьцярушваючы сілы. (І гэта прытым, што кароль Гішпаніі капітуляваў адразу). «Рускі паход», як і ўварваньне ў Гішпанію, Напалеон пасьля называў сваёй найбольшай памылкай.

* * *

Гэтая сытуацыя добра высьветліла, хто ёсьць хто і хто чаго варты.

* * *

Тут прасьцей тым, хто мае чым сябе заняць.

* * *

Андрэя Скурко затрымалі 8 ліпеня 2021 году разам з рэдактарам «Нашай нівы» Ягорам Марціновічам. Перш быў падазраваным паводле арт. 342 Крымінальнага кодэксу (арганізацыя і падрыхтоўка дзеяньняў, якія груба парушаюць грамадзкі парадак, альбо актыўны ўдзел у іх).

Далей затрыманьне працягнулі ўжо паводле ч. 2 арт. 216 Крымінальнага кодэксу (нанясеньне маёмаснай шкоды без прыкмет раскраданьня).

12 ліпеня 2021 году Андрэя Скурко прызналі палітвязьнем. Цяпер ён знаходзіцца ў СІЗА № 1 Менску.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG