Лінкі ўнівэрсальнага доступу

У 2021 годзе Расею пакінулі 1,5 тысячы актывістаў і журналістаў


Ілюстрацыйнае фота

Больш за 1,5 тысячы актывістаў і журналістаў пакінулі Расею ў 2021 годзе з прычыны палітычнага і крымінальнага перасьледу.

Пра гэта піша Znak.com са спасылкай на мэнэджара праектаў арганізацыі Free Russia Foundation Антона Міхальчука. Пры гэтым арганізацыя ўлічвае толькі «палітычных» эмігрантаў. Іх сямейнікаў ці тых, хто проста расхацеў жыць у Расеі і вырашыў зьехаць, у статыстыцы няма, адзначыў Міхальчук.

Галоўнымі напрамкамі эміграцыі, паводле яго слоў, сталі Грузія, Літва і Ўкраіна. Акрамя таго, папулярныя іншыя краіны Ўсходняй Эўропы, а таксама Францыя і ЗША.

Згодна з Free Russia Foundation, хваля палітычнай эміграцыі пачалася вясной 2021 году, калі паліцыя пачала прыходзіць да ўдзельнікаў зімовых мітынгаў у падтрымку Аляксея Навальнага. Тады, паводле статыстыкі «ОВД-Инфо», да адміністрацыйнай адказнасьці было прыцягнута больш за 200 чалавек, якіх распазналі з дапамогай камэр відэаназіраньня. Акрамя таго, некаторыя актывісты сталі абвінавачанымі па крымінальных справах аб арганізацыі масавых беспарадкаў, перакрыцьці дарог і парушэньні каранавірусных абмежаваньняў.

Па падліках «Коммерсанта», апублікаваных у лістападзе, каля паловы з 38 былых каардынатараў рэгіянальных штабоў Аляксея Навальнага зьехалі з краіны ці зьбіраюцца гэта зрабіць.

У кастрычніку 2021 году дасьледаваньне выданьня «Такие дела» і экспэртаў паказала, што за апошнія 20 гадоў з Расеі на сталае месца жыхарства ў іншыя краіны зьехалі ад чатырох да пяці мільёнаў чалавек. Пасьля 2011 году колькасьць эмігрантаў няўхільна расьце, у апошнія гады іх каля 300 тысяч. Аўтары дасьледаваньня таксама правялі апытаньне людзей, якія зьехалі з Расеі. Амаль дзьве траціны зь іх (64%) назвалі прычынай эміграцыі імкненьне да бясьпекі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG