Лінкі ўнівэрсальнага доступу

Былога студэнта БДУ, які адмовіўся ад прэзыдэнцкай стыпэндыі, асудзілі на 5 год у калёніі ўзмоцненага рэжыму


Арцём Баярскі, палітвязьні, былы студэнт БДУ

Працэс у Менскім гарадзкім судзе праходзіў у закрытым рэжыме.

20-гадовага палітзьняволенага Арцёма Баярскага ўтрымліваюць за кратамі ўжо дзевяць месяцаў.

Студэнта-хіміка Арцёма Баярскага асудзілі на 5 гадоў у калёніі ўзмоцненага рэжыму. Вырак абвясьціў Менскі гарадзкі суд 9 сьнежня, паведамляе «Вясна».

Арцёма Баярскага прызналі вінаватым паводле двух артыкулаў Крымінальнага кодэксу: ч. 1 арт. 361-1 (стварэньне і кіраваньне экстрэмісцкім фармаваньнем) і ч. 1 арт. 342 (арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх).

Суд ішоў паўтара тыдня ў закрытым рэжыме. Справу разглядала судзьдзя Алена Шылько.

Арцём пад вартай ужо больш за 8 месяцаў. Пры затрыманьні яго зьбівалі. Двойчы за час зьняволеньня яму дазволілі ўбачыцца з бацькамі.

Хто такі Арцём Баярскі

Арцёму Баярскаму 20 гадоў, родам ён з Горадні. Вучыўся на другім курсе хімфаку БДУ. У жніўні 2020 году адмовіўся ад прэзыдэнцкай стыпэндыі разам з сотняй іншых студэнтаў. Яшчэ школьнікам ён чатыры разы займаў прызавыя месцы на нацыянальных алімпіядах у хіміі. Пасьля затрыманьня яго выключылі з БДУ. У верасьні яго завочна залічылі ў Ковенскі ўнівэрсытэт Вітаўтаса Вялікага на бакаляўрскую праграму «Біятэхналёгія».

Першы раз Арцёма затрымалі 16 лістапада 2020 году пасьля маршу пажылых людзей у Менску. Тады арыштавалі на 15 сутак.

Другі раз яго жорстка затрымалі сёлета 24 сакавіка за бел-чырвона-белы сьцяг, які нібыта вісеў на 11-м паверсе ягонага інтэрнату. Спачатку ён адбыў адміністрацыйны арышт. Потым на яго завялі крымінальную справу за «стварэньне экстрэмісцкага фармаваньня» (пагражае да 7 гадоў калёніі).

Зьявілася відэа, дзе Баярскі прызнаецца, што адміністраваў «экстрэмісцкі» рэсурс «Мая краіна Беларусь». Ён расказаў, што перад тым, як запісвалася гэтае відэа, яго білі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG