Лінкі ўнівэрсальнага доступу

Прэзыдэнт Зэман прызначыў Пэтра Фіялу кіраўніком ураду Чэхіі


Пэтр Фіяла, новы прэм’ер-міністар Чэхіі

У Чэхіі ў нядзелю, 28 лістапада 2021 году, у замку Ланы, у адной з дзьвюх афіцыйных рэзыдэнцый прэзыдэнта рэспублікі адбылася цырымонія прызначэньня прэм’ер-міністра Пэтра Фіялы.

Пэтр Фіяла — палітык лібэральна-кансэрватыўнага кірунку. У пэрыяд паміж траўнем 2012 году і ліпенем 2013 году быў міністрам адукацыі, моладзі і фізычнай культуры ва ўрадзе Пэтра Нэчаса. У акадэмічным асяродзьдзі вядомы як былы рэктар і прарэктар Масарыкавага ўнівэрсытэту ў Брне.

Прэзыдэнт Чэхіі Мілаш Зэман (справа) прызначае Пэтра Фіялу кіраўніком ураду. Рэзыдэнцыя ў замку Ланы, 28 лістапада 2021
Прэзыдэнт Чэхіі Мілаш Зэман (справа) прызначае Пэтра Фіялу кіраўніком ураду. Рэзыдэнцыя ў замку Ланы, 28 лістапада 2021

Фіяла — старшыня праўленьня аналітычнага цэнтру «Правы бераг», мэта якога — стварэньне ідэалягічнай асновы правай лібэральна-кансэрватыўнай палітыкі. У пэрыяд паміж 2007 і 2012 гадамі быў сябрам праўленьня Інстытуту вывучэньня таталітарных рэжымаў.

Як паведамлялася на сайце прэзыдэнта Чэскай Рэспублікі, цырымонія прызначэньня кіраўніка ўраду была падрыхтаваная так, каб забясьпечыць выкананьне патрабаваньняў Канстытуцыі ва ўмовах надзвычайнага становішча і дзейных гігіенічных мераў.

У прэзыдэнта Чэхіі Мілаша Зэмана днямі пацьверджаны COVID-19.

Канстытуцыйны акт, як было загадзя абвешчана, праходзіў у адпаведнасьці з надзвычай строгімі гігіенічнымі мерамі. Прэзыдэнт рэспублікі выказаў асабістую згоду на ўсе меры і гатовасьць прыняць іх у сваіх інтарэсах. Прэзыдэнт, у інвалідным вазку, быў аддзелены ад прысутных спэцыяльнай празрыстай сьцяной. Разам з тым паміж кіраўніком дзяржавы і прызначаным прэм’ер-міністрам забясьпечваўся візуальны і гукавы кантакт.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG