Лінкі ўнівэрсальнага доступу

Мінабароны паведаміла аб прыпыненьні практычнага супрацоўніцтва NATO з Рэспублікай Беларусь


Сьцягі краін-удзельніц NATO ля штаб-кватэры арганізацыі ў Брусэлі

Міністэрства абароны Беларусі выступіла з заявай: «Вакол нас фармуецца пояс недружалюбных дзяржаў».

Міністэрства абароны Беларусі выпусьціла заяву начальніка Генэральнага штабу Ўзброеных Сіл — першага намесьніка міністра абароны Віктара Гулевіча, у якой папярэдзіла пра «гатовасьць рэагаваць на ўзмацненьне ваеннай актыўнасьці на зьнешнім контуры дзяржаўнай мяжы Рэспублікі Беларусь».

У прыватнасьці, ён заявіў, што «літаральна на днях быў зроблены чарговы недружалюбны крок з боку эўрапейскіх дзяржаў: па ініцыятыве NATO быў згорнуты яшчэ адзін канал дыялёгу і прыпынена практычнае супрацоўніцтва Паўночнаатлянтычнага альянсу з Рэспублікай Беларусь».

Цяперашнюю сытуацыю ў ведамстве назвалі «складанай на фоне сацыяльна-палітычнай абстаноўкі», а міграцыйны крызіс — нібыта «створаны краінамі Захаду».

«Фіксуецца пастаяннае павелічэньне інтэнсіўнасьці палётаў выведнай і баявой авіяцыі краін-чальцоў NATO ўздоўж дзяржаўнай мяжы. Калі месяц таму агульная колькасьць самалётавылётаў за суткі складала 2-3, то цяпер лічба павялічылася ўдвая. Але што яшчэ больш важна, мы адзначаем прыцягненьне да выкананьня задач баявой авіяцыі трэціх краін. Мінімальная аддаленасьць маршрутаў ад дзяржмяжы Рэспублікі Беларусь складае 15–20 кілямэтраў», — гаворыцца ў паведамленьні.

Міністэрства абароны падкрэсьліла, што калі ўлічваць «агрэсіўныя паводзіны Ўкраіны» ў адносінах да Беларусі, то, па сутнасьці, вакол краіны фармуецца «пояс недружалюбных дзяржаў».

«Парушаюцца ўсе міжнародныя дамоўленасьці ў пытаньнях бясьпекі і транспарэнтнасьці вайсковай дзейнасьці. Зьневажаюцца палажэньні Венскага дакумэнта аб мерах умацаваньня даверу. Мы прапаноўвалі польскаму боку двухбаковую сустрэчу спэцыялістаў для назіраньня за вайсковай дзейнасьцю. Але прапановы, якія дазволілі б зьняць напружанасьць, пакуль не знайшлі чаканай падтрымкі», — наракае беларускае Мінабароны.

Афіцыйны Менск «насьцярожвае», што нібыта адбываецца «непрыхаваная мілітарызацыя грамадзкай сьвядомасьці ў суседніх краінах».

Мігранцкі крызіс — 2021. Асноўнае

  • У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
  • Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
  • Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
  • У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
  • Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
  • Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
  • Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
  • 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
  • 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
  • На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
  • 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
  • У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
  • 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
  • 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
  • 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
  • Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
  • 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
  • Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
  • 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
  • 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.
  • На больш чым дзесяці эвакуацыйных рэйсах у Ірак і Сырыю ў лістападзе-сьнежні Беларусь пакінулі каля 4,5 тысяч мігрантаў.
  • На пачатку 2022 году сталі вядомыя тэрміны пабудовы агароджаў на мяжы зь Беларусьсю. Польшча адзначыла, што агароджу дабудуюць да канца чэрвеня, а Літва, што да восені.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG