Лінкі ўнівэрсальнага доступу

Хроніка перасьледу 23 лістапада: экс-міліцыянта адправілі пад арышт за выдаваньне зьвестак пра былых калег

абноўлена

Уладзімер Кашко

У Беларусі працягваецца крымінальны перасьлед грамадзян, таксама заводзяцца адміністрацыйныя справы, праводзяцца ператрусы.

Футбольным заўзятарам з Мазыра вынесьлі жорсткія прысуды

Пяць юнакоў пакаралі пазбаўленьнем волі на тэрміны ад 3 да 3,5 года.

23 лістапада ў Мазыры агучылі выракі групе маладых людзей, якіх пасьля затрыманьня ў траўні МУС Беларусі называў «футбольнымі фанатамі».

Суд праходзіў у закрытым рэжыме. Данііла Скіпальскага, Паўла Дворака, Аляксандра Сузько і Аляксандра Цімашэнку асудзілі на 3 гады калёніі з выплатай па 1,5 тысячы рублёў маральнай кампэнсацыі міліцыянту. Кірыла Канапацкага пакаралі трыма з паловай гадамі пазбаўленьня волі і такой жа сумай кампэнсацыі.

Затрыманьні прайшлі ў Мазыры 4 траўня. Тады арыштавалі звыш 10 жыхароў райцэнтру.

Большасьць затрыманых знаёмыя паміж сабой, яны фанаты футбольнага клюбу «Славія». Ім ад 18 да 27 гадоў.

19-гадовага Данііла Скіпальскага затрымалі, калі ён вяртаўся з працы.

«Чацьвёртага траўня ранкам вяртаўся з працы (ён працуе вартаўніком у будаўнічай фірме). На яго напалі два чалавекі ў цывільным, заламалі рукі. Пад’ехаў мікрааўтобус, адтуль выскачылі шэсьць чалавек са зброяй і пацягнулі ў мікрааўтобус. Гэта быў САХР (спэцыяльны атрад хуткага рэагаваньня. — РС)», — расказваў раней Свабодзе сваяк Данііла.

Блізкім паведамілі, што хлопцаў затрымалі паводле арт. 342 Крымінальнага кодэксу (групавыя дзеяньні, якія груба парушаюць грамадзкі парадак). Сказалі, што яны кідалі камяні ў АМАП, выкарыстоўвалі пярцовыя балёнчыкі. Таксама іх абвінавацілі ў гвалце над міліцыянтам (артыкул 364 КК).

Пацярпелым прызналі начальніка мясцовага ДАІ.

Прысуд экс-міліцыянту: арышт

У Гомлі экс-міліцыянта асудзілі да 3 месяцаў арышту за зьліў дадзеных сваіх калегаў. Справу разглядаў суд Савецкага раёну і прысудзіў 30-гадоваму былому міліцыянту Ўладзімеру Кашко 3 месяцы арышту. Яго абвінавацілі ў зьліве адміністратару Telegram-каналу пэрсанальных зьвестак 27 супрацоўнікаў міліцыі Гомельшчыны, паведамляе «Вясна».

Дзеяньні Кашко кваліфікавалі паводле часткі 1 і 2 артыкулу 203-1 КК («наўмысныя незаконныя збор, перадача і распаўсюд інфармацыі аб прыватным жыцьці і(ці) пэрсанальных дадзеных іншай асобы безь яе згоды, якія пацягнулі нанясеньне істотнай шкоды правам, свабодам і законным інтарэсам грамадзяніна»). Гэты артыкул у Крымінальным кодэксе зьявіўся толькі 26 траўня сёлета.

Адразу пасля ўнясеньня зьменаў гэты артыкул прымянілі супраць гомельскага міліцыянта.

Судзьдзя Андрэй Лагуновіч таксама пастанавіў спагнаць з гамельчука кампэнсацыю маральнай шкоды пацярпелым у памеры 13 600 рублёў.

У Магілёве затрымалі маці з дачкой

Ад родных затрыманых стала вядома, што а 10.30 раніцы дадому да іх прыйшлі супрацоўнікі міліцыі і забралі дачку — Сенажэнку Лізавету. Празь некалькі гадзін затрымалі маці Лізаветы — Кацярыну Адзінцову. На дадзены момант яны знаходзяцца ў РАУСе Ленінскага раёну.

Санкцыя была толькі на імя Лізаветы. Па словах родных, ператрусу дома не было, прычына затрыманьня зьвязана з экстрэмізмам — меркавана, з «забароненымі» тэлеграм-каналамі.

Дзяўчыне, якая прыйшла зь бел-чырвона-белым сьцягам на апошні званок, прысудзілі штраф

17-гадовая Ядвіга Малашчанка прайшла на апошнім званку зь бел-чырвона-белым сьцягам на плячах і сфатаграфавалася зь ім. За гэта на яе завялі справу, некалькі разоў дапыталі і прапанавалі пакаяцца на відэа.

У складзеных участковым Дзьмітрыем Бублікам пратаколах было ўказана, што Малашчанка ўдзельнічала ў адзіночным пікетаваньні, публічна выказвала асабістыя і грамадзка-палітычныя інтарэсы і публічна пратэставала супраць дзейнай улады на тэрыторыі навучальнай установы і каля яе.

Ядвіга вінаватай сябе не прызнала.

Урэшце камісія ў справах непаўналетніх пры Баранавіцкім гарвыканкаме вынесла ёй папярэджаньне. Але пракурор гэтае рашэньне апратэставаў — і цяпер Ядвіга Малашчанка павінна заплаціць яшчэ і штраф — 70 рублёў, а таксама пеню да яго, паведаміла Радыё Рацыя.

Сына палітзняволенай Таццяны Канеўскай арыштавалі яшчэ раз

Аляксея Канеўскага ў Гомлі арыштавалі яшчэ на 15 сутак, паведаміў Тэлеграм-канал праваабарончай арганізацыі «Вясна». Артыкул, паводле якога яго асудзілі, пакуль невядомы. На волю ён мусіць выйсці 8 снежня.

Такім чынам, у гомельскім ізалятары Аляксей правядзе месяц.

Затрымалі салігорскага актывіста Паўла Батуева

У Салігорску адбываецца ператрус у актывіста Паўла Батуева. Пра гэта ўвечары паведаміў Тэлеграм-канал праваабарончай арганізацыі «Вясна». Пазьней дадалі, што актывіста затрымалі супрацоўнікі з Менску, калі ён ішоў забіраць дачку з дзіцячага садка. Затым яго павезьлі на вобшук у хату бацькі, дзе ён жыў апошнім часам. Пасьля заканчэньня гэтага вобшуку Паўла павезьлі на другі вобшук у яго асноўную кватэру. У межах якой справы затрыманы Павел Батуеў, пакуль невядома.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG