Лінкі ўнівэрсальнага доступу

Будучы ўрад Нямеччыны заплянаваў легалізаваць марыхуану


У Нямеччыне ў недалёкай будучыні можа быць легалізавана ўжываньне марыхуаны. Пра гэта дамовіліся тры партыі, якія вядуць цяпер перамовы аб фармаваньні новага ўраду, — паведамляе выданьне Politico са спасылкай на нямецкія СМІ.

Сацыял-дэмакраты, «Зялёныя» і Свабодныя дэмакраты дамовіліся легалізаваць ужываньне марыхуаны ў рэкрэацыйных мэтах і продаж канабісу дарослым у спэцыялізаваных крамах. На права продажу марыхуаны будзе выдавацца ліцэнзія, умовамі атрыманьня якой будуць гарантыі кантролю якасьці і забарона на продаж прадукцыі непаўналетнім. Пакуль незразумела, ці будзе таксама легалізаванае вырошчваньне канопляў з мэтай атрыманьня марыхуаны.

У гэты момант канабіс легалізаваны ў Нямеччыне для ўжываньня ў мэдычных мэтах. «Зялёныя» і Свабодныя дэмакраты доўгі час выступаюць за поўную легалізацыю марыхуаны — пры ўмове дзяржаўнага кантролю за рынкам.

Перамовы аб новым кабінэце пачаліся неўзабаве пасьля выбараў у Бундэстаг, на якіх посьпеху дабіліся перш за ўсё сацыял-дэмакраты. Разам зь «Зялёнымі» і Свабоднымі дэмакратамі ў іх будзе большасьць у парлямэнце, а хрысьціянскія дэмакраты ўпершыню за доўгі час апынуцца ў апазыцыі. Аднак з прычыны рознагалосьсяў па шэрагу пытаньняў паміж партыямі перамовы, як чакаецца, зоймуць яшчэ як мінімум некалькі тыдняў. Пакуль ва ўладзе застаецца ранейшы кабінэт канцлеркі Ангелы Мэркель.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG