Лінкі ўнівэрсальнага доступу

Лукашэнка зноў размаўляў з Пуціным пра мігранцкі крызіс


Аляксандар Лукашэнка і Ўладзімір Пуцін. Архіўнае фота

Пра размову паміж прэзыдэнтам Расеі Ўладзімірам Пуціным і Аляксандрам Лукашэнкам паведамілі іх прэсавыя службы.

Яны абмеркавалі «міграцыйную сытуацыю» на межамх Беларусі з краінамі Эўразьвязу», гаворыцца ў паведамленьні на сайце kremlin.ru.

«Выказана сурʼёзная заклапочанасьць у сувязі зь непрымальнымі, жорсткімі дзеяньнямі полькіх памежнікаў, уключаючы актыўнае выкарыстаньне грубай сілы і спэцсродкаў», — паведаміў сайт прэзыдэнта Расеі.

Лукашэнка расказаў Пуціну пра дээскаляцыю крызісу, гуманітарную дапамогу мігрантам і пра званок выканаўцы абавязкаў канцлера Нямеччыны Ангелы Мэркель.

Лукашэнка і Пуцін «адзначылі важнасьць наладжваньня ўзаемадзеяньня Менску з Эўразьвязам для ўрэгуляваньня праблемы», — адзначана ў паведамленьні.

Таксама Лукашэнка і Пуцін абмеркавалі гандлёвыя і эканамічныя пытаньні.

18 лістапада Пуцін заклікаў беларускія ўлады да дыялёгу з апазыцыяй.

«Так, мы ведаем, што сытуацыя ў Беларусі хоць і супакоілася ўнутры краіны, але, тым ня менш, праблемы ёсьць, і мы выдатна разумеем гэта і, вядома, заклікаем да дыялёгу паміж уладамі і апазыцыяй», — сказаў Пуцін, выступаючы на пашыраным пасяджэньні калегіі МЗС.

Пры гэтым прэзыдэнт Расеі падкрэсьліў, што «са свайго боку Расея, безумоўна, працягне лінію на ўмацаваньне сувязяў і паглыбленьне інтэграцыйных працэсаў зь Беларусьсю».

Заклік Пуціна да перамоваў пракамэнтавала беларуская апазыцыйная палітычная дзяячка Сьвятлана Ціханоўская.

«Асабіста ў мяне кантактаў з Крамлём не было. Я вітаю заклікі да дыялёгу. Але ніякі дыялёг не пачнецца ў турме. Усе палітвязьні павінны быць вызваленыя, гвалт спынены. Нашы ўмовы ранейшыя», — сказала Ціханоўская.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG