Лінкі ўнівэрсальнага доступу

Прэзыдэнт Украіны падпісаў закон аб барацьбе з алігархамі


Уладзімір Зяленскі

Прэзыдэнт Украіны Ўладзімір Зяленскі падпісаў закон аб барацьбе з алігархамі. Згодна з дакумэнтам, грамадзян з актывамі больш за два мільярды грыўняў (прыкладна $83 млн) будуць абмяжоўваць ва ўплыве на палітычнае жыцьцё краіны.

Акрамя таго, да алігархаў могуць быць залічаныя тыя, хто ўдзельнічае ў палітыцы, мае ўплыў на СМІ ці валодае кампаніяй-манапалістам. Ім будзе забаронена фінансаваць партыі, падтрымліваць кандыдатаў на выбарах і выступаць з палітычнымі заявамі.

Вызначаць сьпіс алігархаў будзе Рада нацыянальнай бясьпекі і абароны. Чакаецца, што закон дапаможа пазбавіць дзяржаву ад пагроз з боку людзей, якія маюць празьмерныя эканамічныя ці палітычныя магчымасьці.

«Цяпер усе эканамічныя гульцы будуць роўныя перад законам і ня змогуць купляць для сябе палітычныя прывілеі», — напісаў Уладзімір Зяленскі ў твітэры.

Па дадзеных украінскага Мін'юста, крытэрам, указаным у законе, адпавядаюць як мінімум дзьве асобы — былы прэзыдэнт і цяперашні дэпутат Вярхоўнай Рады Пятро Парашэнка і бізнэсовец Ігар Каламойскі.

Крытыкі дакумэнта кажуць, што ўлады змогуць выкарыстоўваць закон для ціску на апанэнтаў.

У канцы верасьня Вярхоўная Рада Ўкраіны прыняла законапраект, які абмяжоўвае дзейнасьць алігархаў. Яго ініцыятарам быў прэзыдэнт Украіны. Дакумэнт набудзе моц праз паўгода пасьля публікацыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG