Лінкі ўнівэрсальнага доступу

Выбары-2021 у ЗША: перамога рэспубліканца ў Вірджыніі стане тэстам для Байдэна


Глен Янгкін пасьля перамогі на выбарах губэрнатара Вірджыніі

Пераканаўчая перамога рэспубліканца Глена Янгкіна на выбарах губэрнатара Вірджыніі, верагодна, натхніць і зарадзіць энэргіяй рэспубліканцаў перад важнымі прамежкавымі выбарамі ў наступным годзе, калі будзе вырашацца пытаньне пра кантроль над Кангрэсам — паведамляе «Голас Амэрыкі»

Апярэдзіўшы дэмакрата Тэры Макаліфа, Глен Янгкін, магчыма, стане прыкладам для рэспубліканскіх кандыдатаў у 2022 годзе, у той час як дэмакраты зараз павінны занепакоіцца з нагоды зьніжэньня рэйтынгу прэзыдэнта Джо Байдэна.

Для Байдэна і дэмакратаў гэта быў цяжкі год. Пандэмія COVID-19 працягваецца, а агмяні супраціву вакцынацыі застаюцца. Вывад войскаў з Афганістану быў расцэнены многімі як хаатычны і няўмелы.

Прэзыдэнт прыкладае вялікія намаганьні, каб згуртаваць памяркоўных і прагрэсіўных дэмакратаў вакол яго заканадаўчага парадку дня. У той жа час цэны на спажывецкія тавары, прадукты харчаваньня і паліва рэзка вырасьлі, і выбарнікі, як правіла, вінавацяць у гэтым партыю ўлады.

Прасьцей кажучы, Байдэн не даў выбарнікам, асабліва тым, хто не ўваходзіць у дэмакратычную базу, асаблівай нагоды для радасьці, — адзначае «Голас Амэрыкі».

Янгкін скарыстаўся гэтымі праблемамі. Параза Макаліфа ў штаце, дзе Байдэн перамог з разрывам у 10 адсоткавых пунктаў год таму, а таксама больш напружаная, чым чакалася, барацьба на выбарах губэрнатара штату Нью-Джэрсі, не пакідаюць сумневаў у тым, што палітычнае становішча дэмакратаў аслабла.

Макаліф восем гадоў таму перамог на губэрнатарскіх выбарах у Вірджыніі. Ён быў папулярным губэрнатарам, але канстытуцыя штату не дазваляе палітыкам займаць крэсла губэрнатара два тэрміны запар. Таму ён сышоў, а сёлета паспрабаваў вярнуць сабе пасаду.

«Дэмакратычная партыя мае сур’ёзныя праблемы, — заявіў у эфіры камэнтатар тэлеканалу Fox News Брыт Гʼюм. — Відавочна, што выбарнікі расчараваныя ў прэзыдэнце Байдэне, іх трывожыць інфляцыя, іх турбуе тое, што адбываецца ў школах, людзі раздражнёныя нашым катастрафічным зыходам з Афганістану».

Камэнтатары, блізкія да Дэмакратычнай партыі, прапануюць іншую інтэрпрэтацыю прычынаў паразы свайго кандыдата:

«Ня трэба забываць, што мы назіралі за тым, ці атрымаецца ў Тэры Макаліфа зрабіць тое, чаго нікому да яго зрабіць не ўдавалася, — кажа Лоўрэнс Аданэл, камэнтатар тэлеканалу MSNBC. — У гісторыі Вірджыніі быў толькі адзін выпадак, калі былы губэрнатар здолеў перамагчы на губэрнатарскіх выбарах двойчы. Гэта быў Мілс Годвін, які выйграў выбары ў 1965 годзе як кандыдат ад Дэмакратычнай партыі і ў 1973 годзе як рэспубліканец. Так што можна сказаць, што ў гэтым выпадку гістарычны прэцэдэнт узяў верх».

Янгкін атрымаў дадатковы імпульс у кампаніі, сканцэнтраваўшыся на пытаньнях адукацыі ў той час як школы сталі эпіцэнтрам некалькіх культурных войнаў у ЗША.

Рэспубліканскі кандыдат выкарыстаў напружанасьць паміж бацькамі і школьнымі радамі ў пытаньнях гендэру і так званай «крытычнай расавай тэорыі» як сьведчаньне таго, што школьныя праграмы занадта палявелі.

Макаліф, магчыма, дапусьціў самую вялікую памылку ў кампаніі, калі заявіў на дэбатах: «Ня думаю, што бацькі павінны ўказваць школам, чаму яны павінны вучыць».

Гэтая фраза неўзабаве стала галоўным аб’ектам нападаў Янгкіна ў яго рэкляме, і гэтая тэма ў цэлым, магчыма, знайшла водгук у шматлікіх бацькоў з прыгарадаў.

Згодна з экзітполам CNN, пераважная большасьць выбаршчыкаў (76%), якія лічаць, што бацькі павінны валодаць «істотным» правам голасу ў вызначэньні зьместу школьнага навучаньня, прагаласавалі за Янгкіна.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG