Лінкі ўнівэрсальнага доступу

У справе аб «здрадзе дзяржаве» затрымалі як мінімум 13 рабочых


Пратэставае шэсьце рабочых у Менску, жнівень 2020 году.

Па Беларусі 21-23 верасьня пракацілася хваля затрыманьняў завадчанаў і страйкамаўцаў з «Гродна Азот», Беларускага мэталюргічнага заводу, Беларускай чыгункі і «Нафтану». Затрымалі сама меней 13 чалавек.

Некалькі чалавек з «Гродна Азот» выпусьцілі, але 13 чалавек затрымалі і зьмясьцілі ў СІЗА КДБ і гомельскае СІЗА № 3. Паводле папярэдняй інфармацыі праваабаронцаў, іх затрымалі ў межах артыкулу 356 (здрада дзяржаве), піша «Вясна».

Санкцыя ў гэтым артыкуле прадугледжвае да 15 гадоў пазбаўленьня волі.

26 верасьня на дзяржаўным тэлевізійным канале АНТ выйшаў сюжэт пра затрыманых рабочых. У этэры заявілі, што 21 верасьня арганізацыю «Рабочы рух» прызналі экстрэмісцкай, і назвалі лічбу ў 13 затрыманых чалавек.

Папярэдне вядома, што ўсім ставіцца ў віну арт. 356 Крымінальнага кодэксу (здрада дзяржаве). Таксама па АНТ паведамілі пра крымінальную справу за «стварэньне экстрэмісцкага фармаваньня» (арт. 361-1 КК). У адносінах да некаторых рабочых ідзе гаворка таксама пра іншыя артыкулы, напрыклад арт. 357 («змова або іншыя дзеяньні, зьдзейсьненыя з мэтай захопу дзяржаўнай улады»).

Затрыманыя рабочыя:

  • Сяргей Шэлест, былы апаратчык цэху «Аміяк-3», СІЗА КДБ;
  • Андрэй Пагерыла, былы сьлесар-рамонтнік цэху «Аміяк-3», СІЗА КДБ;
  • Уладзімер Жураўка, былы апэратар ДПУ цэху «Аміяк-3», СІЗА КДБ;
  • Андрэй Башан, супрацоўнік цэху «Аміяк-3», СІЗА КДБ;
  • Валянцін Цераневіч, памочнік майстра на заводзе «Хімвалакно» (які ўваходзіць у склад «Гродна Азоту»), намесьнік старшыні Беларускага незалежнага прафсаюзу «Гродна Азоту»;
  • Вадзім Яфіменка, супрацоўнік «Хімвалакно»;
  • Дзьмітры Елісееў, супрацоўнік БМЗ, гомельскае СІЗА № 3;
  • Сьвятлана Зыль, былая супрацоўніца БМЗ, гомельскае СІЗА № 3;
  • Аляксандар Гашнікаў, супрацоўнік БМЗ, СІЗА КДБ;
  • Сяргей Дзюба, БЧ, СІЗА КДБ;
  • Максім Саковіч, старшы энэргадыспэтчар БЧ, СІЗА КДБ;
  • Ганна Аблаб, БЧ, СІЗА КДБ;
  • Аляксандар Капшуля, былы юрысконсульт ААТ «Нафтан», заводу «Палімір», СІЗА КДБ.

Праваабаронцы зазначаюць, што прыведзены сьпіс можа быць няпоўным. Магчыма, пакуль невядома пра іншыя затрыманьні ці вызваленьні.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG