Лінкі ўнівэрсальнага доступу

«Жаночае» выдавецтва Сьвятланы Алексіевіч ужо год ня можа атрымаць рэгістрацыю


Ілюстрацыйнае фота. Сьвятлана Алексіевіч пасьля допыту ў Сьледчым камітэце 26 жніўня ў рамках крымінальнай справы супраць Каардынацыйнай рады

«У нас складаецца ўражаньне, што нам спэцыяльна чынілі перашкоды, каб мы не змаглі атрымаць рэгістрацыю і не змаглі працаваць», — кажа галоўная рэдактарка незарэгістраванага выдавецтва «Пфляўмбаўм» Алена Казлова.

Ніводзін з тэлефонаў Міністэрства інфармацыі, у тым ліку Ўпраўленьня па выдавецкай і паліграфічнай дзейнасьці, у другой палове дня 26 жніўня не адказваў.

Алена Казлова кажа, што юрасобу для выдавецтва зарэгістравалі ўжо год таму — гэта ТАА «Пфляўмбаўм».

Алена Казлова
Алена Казлова

«З кастрычніка мінулага году нашая дырэктарка Натальля Рак падавала дакумэнты ў Міністэрства інфармацыі, каб мы прайшлі кваліфікацыйны экзамэн па выдавецкай дзейнасьці, — кажа Казлова. — Падавалі разоў сем. Дакумэнты ў Міністэрстве трымалі максымальна магчымы па заканадаўстве час — месяц, і поштай адпраўлялі назад. Знаходзілі розныя неадпаведнасьці і на гэтай падставе вярталі».

Урэшце экзамэн прызначылі, але Натальлі Рак адмовілі ў рэгістрацыі.

«Яна рыхтавалася паводле кнігі, рэкамэндаванай на сайце Мінінфарма, — тлумачыць Алена Казлова. — Але пытаньняў, якія задавалі на іспыце, у гэтым дапаможніку не было».

На гэтым эпапэя са спробамі зарэгістравацца ў Беларусі ня скончылася. Праз два месяцы, як прадугледжана заканадаўствам, выдавецтва падала дакумэнты на прызначэньне новага іспыту.

«У нас іх прынялі, але экзамэн не прызначаюць, — расказвае Алена Казлова. — Мы накіравалі скаргу ў Міністэрства інфармацыі, бо парушаюцца нашыя правы. Максымальны тэрмін для прызначэньня экзамэну — месяц. 15 ліпеня быў апошні тэрмін, калі яны мусілі праінфармаваць нас аб тым, калі яны прызначаць дату.

Нам прыйшоў адказ на скаргу пра тое, што нам прызначаць экзамэн у бліжэйшы тэрмін, але больш ніякіх зьвестак».

Перапіску зь Міністэрствам інфармацыі галоўная рэдактарка выклала на старонцы выдавецтва ў фэйсбуку.

Радыё Свабода спрабавала атрымаць камэнтар у Міністэрстве інфармацыі, аднак ніводзін з тэлефонаў міністэрства не адказваў.

«У нас складаецца ўражаньне, што нам спэцыяльна чынілі перашкоды, каб мы не змаглі атрымаць рэгістрацыю і не змаглі працаваць. Мы зьвязваем гэта з тым, што дзейным уладам не падабаецца Сьвятлана Алексіевіч, якая ініцыявала стварэньне гэтага выдавецтва», — мяркуе галоўная рэдактарка незарэгістраванага выдавецтва «Пфляўмбаўм» Алена Казлова.

Ідэю заснаваць выдавецтва для жанчын ініцыявала нобэлеўская ляўрэатка па літаратуры Сьвятлана Алексіевіч. Першымі аўтарамі выдавецтва маюць стаць Ева Вежнавец і Тацяна Скарынкіна.

26 жніўня Сьвятлану Алексіевіч як сябра Каардынацыйнай рады выклікалі на допыт у Сьледчы камітэт у якасьці сьведкі па справе аб спробах захопу ўлады.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG