Лінкі ўнівэрсальнага доступу

Удзельнікі галадоўкі руху «Маці 328» выклікалі хуткую дапамогу


Галадоўка «Маці 328», 14 чэрвеня 2019 году

У вёсцы Востраў Пухавіцкага раёну дзявяты дзень працягваецца галадоўка актывістак руху «Маці 328», якія дамагаюцца лібэралізацыі антынаркатычнага артыкулу 328 Крымінальнага кодэксу.

Галадоўку пачалі 11 чэрвеня 3 жанчыны. Празь дзень да іх далучыўся Стас Цыбінскі, праваабаронца з арганізацыі «Тайм-аўт». У яго сёньня былі праблемы са здароўем.

Страціў прытомнасьць, лекары прыехалі хутка

Паводле ўдзельніцы галадоўкі Алены Кузьміной, раніцай 20 чэрвеня ім давялося выклікаць у Востраў хуткую дапамогу.

Алена Кузьміна
Алена Кузьміна

«На нашых вачах страціў прытомнасьць Стас Цыбінскі, праваабаронца з арганізацыі „Тайм-аўт“, які прыехаў нас падтрымаць. Добра, што „хуткая“ пасьпела, яму аказалі дапамогу. Цяпер ляжыць, папраўляецца», — паведаміла Свабодзе Алена Кузьміна.

Паводле Стаса Цыбінскага, ён галадае 8 дзён, у Востраве стала не жыве, прыяжджае да галадоўніц паміж працоўнымі днямі. Ён працуе бармэнам.

У нядаўнім мінулым Стас Цыбінскі сам адбыў 2 гады зьняволеньня паводле 328 артыкулу і мяркуе, што ў гэты артыкул трэба ўнесьці большыя карэктывы, чым прапанавалі дэпутаты Палаты прадстаўнікоў Нацыянальнага сходу.

«Ляжым у цені і п’ём шмат вады»

20 чэрвеня ў Востраве галадалі 4 жанчыны: Алена Кузьміна, Ала Берналь, Людміла Кулініч і Сьвятлана Віткоўская, якая нядаўна прыехала зь Берасьця. У іншых месцах галадаюць таксама Юлія Астраўко і яшчэ адна жанчына, якая просіць не называць яе прозьвішча. Апошнімі днямі ў Востраве стаіць сьпякота, даходзіць да 30 градусаў. Вось што Алена Кузьміна распавяла пра тое, як пачуваюцца галадоўніцы.

«Горш за іншых адвучае сябе Людміла Кулініч, як і падчас леташняй галадоўкі ў яе абвастрылася хранічная хвароба. Ужо страціла 7 кіло вагі. Лекары прапаноўвалі ёй шпіталізацыю, але яна адмаўляецца. Мы ў асноўным ляжым, падымацца і хадзіць ужо цяжка. Кружыцца галава. На двары вялікая сьпякота, таму ляжым у цені і п’ём шмат вады. Мне з Алай таксама прапаноўвалі шпіталізацыю, але мы адмовіліся. Сёньня да нас прыедуць яшчэ нашы актывісткі; казалі, што будуць далучацца да галадоўкі. Вось чакаем», — расказала пра апошнія падзеі Алена Кузьміна.

На 21 чэрвеня галадоўніца Юлія Астраўко прапанавала актывісткам з «Маці 328» прыйсьці сабрацца ў Менску каля будынка Палаты прадстаўнікоў. Юля Астраўко, у якой за распаўсюд наркотыкаў асуджаны непаўналетні сын, лічыць, што трэба праводзіць бестэрміновую акцыю пратэсту.

Што важна ведаць пра галадоўку «Маці 328»

11 чэрвеня актывісткі руху «Маці 328», дзеці якіх адбываюць пакараньне паводле наркатычнага артыкулу, абвясьцілі галадоўку.

Удзельнікі галадоўкі патрабуюць

  • Сустрэчы з Аляксандрам Лукашэнкам;
  • Гуманізацыі антынаркатычнага заканадаўства;
  • Перагляду спраў па 328-м артыкуле;
  • Прыбраць з закону паняцьце «асабліва небясьпечныя наркотыкі»:
  • Адстаўкі старшыні Вярхоўнага суду Валянціна Сукалы;
  • Амністыі для непаўналетніх;
  • Роспуску Палаты прадстаўнікоў Нацыянальнага cходу.

13 чэрвеня 2019 года Палата Прадстаўнікоў у другім чытаньні прыняла папраўкі ў артыкул 328. Мінімальны тэрмін пазбаўленьня волі за незаконнае абарачэньне наркотыкаў зьменшылі на 2 гады.

У красавіку-траўні 2018 годe актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе. Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкулу (ад 5 да 25 гадоў пазбаўленьня волі), а таксама зьменаў у заканадаўства.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG