Лінкі ўнівэрсальнага доступу

Мамін голас — найлепшы інструмэнт. Выйшаў зборнік калыханак па-беларуску


Старонка ў кнігі «Калыханкі»

У выдавецтве «Галіяфы» выйшла беларуская складанка «Калыханкі» для мамаў, дзетак і ўсіх аматараў сьпеваў. Кніга зьмяшчае народныя і аўтарскія творы, а таксама замежныя дзіцячыя песьні ў перакладзе на беларускую мову. На кампакт-дыску ў дадатак — тры дзясяткі музычных кампазыцый.

Вокладка
Вокладка

​Укладальніца «Калыханак» — філёляг Сьвятлана Тоўсьцік, мастачка — Ганна Сілівончык, дызайнэрка — Віялета Кубліцкая. На дыску песьні выконваюць сама Сьвятлана Тоўсьцік, а таксама сьпевакі Данчык, Тацяна Грыневіч, Лера Чубат, Андрэй Лугін.

Задума ўзьнікла ў дэкрэтным водпуску

Сьвятлана Тоўсьцік з дачушкай Рагнедай
Сьвятлана Тоўсьцік з дачушкай Рагнедай

​«У дэкрэтным водпуску зь першым дзіцем даводзілася гадзінамі сьпяваць калыханкі — каб супакоіць, каб хутчэй заснуў, — расказвае Сьвятлана Тоўсьцік. — І вельмі хацелася, каб тэксты заўсёды былі пад рукой — гэткі практычны дапаможнік. Наш край багаты ня толькі на рэкі і азёры, а яшчэ на песьні — проста сьпеўны край! Песьні суправаджаюць беларуса ад нараджэньня. Так нарадзілася ідэя складанкі».

Першага сына ў сям'і назвалі Альгердам, у гонар вялікага князя літоўскага. А літаральна разам з выхадам кніжкі нарадзілася дачушка Рагнеда, па імені першай князёўны на беларускай зямлі.

Пад адной вокладкай — клясыка і новыя творы. Тут і любімыя пакаленьнямі калыханкі «Доўгі дзень» Генадзя Бураўкіна і «Дзед-барадзед» Артура Вольскага, і новыя творы — «Па арэліках да нас ноч спусьціцца мусіла» Эдуарда Акуліна і «Сьпі, мая кветачка» Алеся Камоцкага. Ну і як жа без народных песень накшталт «Люлі-люлі-люлі, прыляцелі куры».

Зьмест дыску
Зьмест дыску

«Разам з тым захапілася ангельскімі дзіцячымі песьнямі, — працягвае Сьвятлана. — Яны вядомыя ва ўсім сьвеце, перакладзеныя на шматлікія мовы. Захацелася, каб загучалі і па-беларуску. Пачала іх перакладаць, выступала ў дзіцячай бібліятэцы, на фэсьце „Каласы пад сярпом тваім“, на занятках „Мова нанова дзеткам“, на „Прамове“ ў ТБМ. Таксама прыхільніца «Сьпеўнага сходу», які ладзіць Сяржук Доўгушаў​.

Але ўсе песьні адразу складана аформіць, вырашыла надрукаваць спачатку тое, што найбольш неабходна нашым бацькам і дзеткам. Гэта, на мой погляд, калыханкі».

Дзевяць першых калыханак былі запісаныя разам з вакалістам Андрэем Лугіным і клявішніцай Аленай Палачанскай з хрысьціянскага гурту Laudans. У той жа час Віталь Абакановіч, муж Сьвятланы Тоўсьцік, зьвярнуўся па дапамогу да мастачкі Ганны Сілівончык, якая аформіла кнігу.

Малюнкі Ганны Сілівончык
Малюнкі Ганны Сілівончык

«Кожную ноч на небе запальваюцца мільёны зорак. Вось і на прыгожых малюнках Ганны Сілівончык яны весела зіхацяць і радуюць сваім сьвятлом нашыя вочы і сэрцы. А песьні пра зорачкі вельмі пранікнёныя і кранальныя.

Не забыліся мы і пра самыя вядомыя з даўніх часоў калыханкі — народныя, якія сьпявалі нашы бабулі. Гэта найлепшы сродак залюляць, закалыхаць дзіця, каб яно хутчэй заснула. Мамін голас — найлепшы інструмэнт. Так што чытайце, глядзіце, слухайце і сьпявайце. І добрых вам сноў!» — кажа Сьвятлана Тоўсьцік.

Выдаць дапамаглі мэцэнаты з ЗША і Канады

Рэалізаваць ідэю «Калыханак» дапамаглі перадусім сябры: Алена Рыдзеўская з ЗША, культурна-адукацыйны фонд Orsa-Romano Cultural and Aducational Foundation, а таксама Ірына Тоўсьцік, сястра Сьвятланы, якая жыве ў Канадзе.

Старонка ў кнізе
Старонка ў кнізе

«Вельмі ўдзячная ўсім аўтарам за тое, што далі згоду і падзяліліся сваімі творамі, — гаворыць укладальніца „Калыханак“. — Гэта Леанід Дранько-Майсюк, Арына Лісецкая, паэты-перакладчыкі Андрэй Хадановіч, Алена Церашкова.

Самай галоўнай Зорцы Раства паэт Алесь Клышка прысьвяціў сапраўдны гімн. А мама дзевяці дзетак Ала Скарабагатая прачытала сваю калыханку пад музыку Шубэрта. Так, асобныя рэчы — як вершы пад клясычную музыку. Напрыклад, „Ціха ноч ступае з зорнаю сявенькай“ Рыгора Барадуліна — пад Баха».

Сьвятлана Тоўсьцік працуе ў мэдыйнай сфэры, сябра Таварыства беларускай мовы імя Францішка Скарыны і Студэнцкага этнаграфічнага таварыства.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG