Лінкі ўнівэрсальнага доступу

Статкевіч: «Мяне бурлівае жыцьцё мышэй не цікавіць»


Мікалай Статкевіч

Мікалай Статкевіч у інтэрвію карэспандэнту Свабоды пракамэнтаваў ініцыятыву Рады Беларускага нацыянальнага кангрэсу аб правядзеньні ў Менску 8 верасьня акцыі папярэджаньня.

— У верасьні пройдуць сумесныя расейска-беларускія вайсковыя вучэньні «Захад-2017». Сцэнар гэтых вучэньняў звычайна агрэсіўны, ён прадугледжвае прарыў у бок Сувалкаўскага калідора. Безумоўна, такі фармат напружвае суседзяў Беларусі. Цяпер на фоне абвастрэньня адносінаў Расеі з НАТО і вядзеньня баявых дзеяньняў на ўсходзе Ўкраіны, ва ўдзеле ў якіх абвінавачваюць Расею, гэтыя засьцярогі яшчэ большыя.

Гучаць галасы пра тое, што тыя тысячы расейскіх вайскоўцаў, якія ўвойдуць у Беларусь падчас вучэньняў, могуць застацца тут у выглядзе пастаяннай вайсковай базы. Акрамя таго, ёсьць засьцярогі і пэўная інфармацыя, што рыхтуюцца базы захоўваньня для расейскай вайсковай тэхнікі. І гэта таксама будзе сьведчыць пра падрыхтоўку да магчымай агрэсіі супраць суседзяў Беларусі, нават калі на гэты раз расейскія войскі выйдуць. Гэта стварае вялікую небясьпеку для незалежнасьці Беларусі, уцягваньня яе ў вайсковы канфлікт.

Беларускі рэжым знаходзіцца ў поўнай эканамічнай, палітычнай і вайсковай залежнасьці ад Расеі. І пры жаданьні расейскае кіраўніцтва здольнае прымусіць яго да любога, у тым ліку да новых вайсковых базаў, да базаў захоўваньня і гэтак далей.

Ва ўсіх прадстаўнікоў апазыцыйных арганізацый ёсьць магчымасьць даказаць, што яны патрыёты

Таму мы лічым, што трэба рэагаваць і папярэдзіць гэтую небясьпеку. Мы вырашлі правесьці 8 верасьня акцыю папярэджаньня. Гэта папярэджаньне агрэсару і гэта спроба папярэдзіць нэгатыўны сцэнар разьвіцьця падзей, пагрозы беларускай незалежнасьці.

Мікалай Статкевіч адзначыў, што 8 верасьня спаўняецца 25 гадоў, як тысячы беларускіх вайскоўцаў, дзейных і ў запасе, прынялі на плошчы Незалежнасьці сымбалічную прысягу на вернасьць Беларусі. Яны паабяцалі бараніць краіну ў выпадку пагрозы.

— Мы лічым у Радзе БНК, што цяпер ёсьць нагода зрабіць падобную акцыю. Мы прапануем Клятву свабоды. Каб людзі, якія выйдуць на гэтую акцыю, пакляліся вызваліць Беларусь з-пад унутранай акупацыі і не дапусьціць вонкавай агрэсіі, вонкавай акупацыі. Мы лічым, калі акцыя будзе масавай, то яна здолее папярэдзіць нэгатыўныя сцэнары. Мы заклікаем усіх патрыётаў Беларусі далучыцца да гэтай акцыі ў 18 гадзін на Кастрычніцкай плошчы Менску 8 верасьня.

— Ці гатовы тэкст Клятвы свабоды?

— Мы будзем яго зацьвярджаць, над ім будзе больш працаваць Уладзімер Някляеў. Мы ўсе будзем працаваць над ім. Я думаю, мы яго надрукуем бліжэй да гэтай акцыі папярэджаньня.

«Перад кім і каму клясьціся?». Палітыкі пра ідэю «прысягі свабоды» 8 верасьня

— Ці разьлічваеце вы на падтрымку іншых партый ці рухаў?

— Калі мы пачыналі 17 лютага кампанію сацыяльнага і палітычнага пратэсту ў Менску, мы не разьлічвалі на падтрымку нейкіх канкрэтных арганізацый, якія не ўвайшлі ў БНК. Але мы разьлічвалі на падтрымку простых людзей, дэмакратычных актывістаў з усіх арганізацый. Мы гэтую падтрымку ў той ці іншай ступені атрымалі. І цяпер мы будзем разьлічваць на падтрымку патрыётаў. А ва ўсіх прадстаўнікоў апазыцыйных арганізацый ёсьць магчымасьць даказаць, што яны патрыёты. А інакш няхай яны шукаюць аргумэнты, чаму яны ня хочуць супрацьстаяць рэальнай пагрозе.

— Андрэй Дзьмітрыеў прапанаваў Міністэрству абароны Беларусі стварыць грамадзкую камісію для назіраньня за беларуска-расейскімі вучэньнямі. Як вы ставіцеся да гэтай ініцыятывы?

— Мяне не цікавяць ініцыятывы людзей, якія паразытуюць на нашым змаганьні. Якіх іншы раз улада прыцягвае, каб паказаць насуперак тым дэмакратычным сілам, якія змагаюцца, што яны нейкія іншыя, нібыта канструктыўныя і гэтак далей. Калі б мы не змагаліся, то гэтыя блазны былі б не патрэбныя і ўладзе. А цяпер яны запатрабаваныя і таму яны бегаюць са шматлікімі ініцыятывамі. Мне гэта не цікава. Я вось сяджу ў доме, там пад падлогай, мабыць, у норах, жывуць мышы, у іх там нейкае цікавае ўнутранае жыцьцё. Але мяне бурлівае жыцьцё мышэй не цікавіць.

Глядзець камэнтары (16)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG