Лінкі ўнівэрсальнага доступу

«Такая ўпартасьць нагадвае адсяканьне хваста за некалькі разоў» — палітоляг пра заяву Лукашэнкі наконт дэкрэту «аб дармаедах»


Аляксандар Класкоўскі

Палітоляг Аляксандар Класкоўскі пракамэнтаваў карэспандэнту Свабоды заяву Аляксандра Лукашэнкі пра дэкрэт № 3, ад якога кіраўнік краіны не адступіцца і якога «не адмяняў і нават не прыпыняў».

«У кожным разе гэты дакумэнт сурʼёзна ўжо перапрацаваны, рыхтуюцца яшчэ зьмены. Дэ-факта мы назіраем усё ж такі адкрутку назад, максымальнае аслабленьне гэтага дэкрэту з тым, каб радыкальна зьменшыць кола людзей, якія падпадаюць пад яго дзеяньне. Іначай кажучы, улада тут усё ж такі адступіла. І гэта рэальны эфэкт пратэстаў.

Але разам з тым Лукашэнка і праз свае асабістыя якасьці, і проста як любы аўтарытарны кіраўнік ня хоча паказацца слабаком. Калі б ён проста скасаваў гэты дэкрэт, то, зь яго гледзішча, гэта азначала б, што «бацька» ўжо ня той. Ва ўсякім разе, так пачне шаптацца электарат. І заўтра гэты электарат можа яшчэ больш разбэсьціцца і пачне яшчэ сьмялей гнаць хвалю супраць улады.

Таму такая заява-падкрэсьліваньне, што ён нічога не адмяняў, мае на мэце піяраўскую звышзадачу, што ён моцна трымае сытуацыю ў руках, не пасуе перад нейкімі выклікамі і ніхто яго ня можа «нахіліць». Хоць насамрэч такая ўпартасьць нагадвае адсяканьне хваста за некалькі разоў. І калі б наверсе адразу прызналі, што была зроблена памылка, гэта сапраўды зьнізіла б і пратэстную актыўнасьць, і дадало б нейкага аўтарытэту высокай уладзе, і проста зьняла б непатрэбную нагрузку з вэртыкалі, якая цяпер круціцца, як вуж на патэльні.

Але, відаць, для афіцыйнага кіраўніка ўсё ж на першым месцы — жаданьне паказаць сябе моцным, жаданьне паказаць сябе правадыром, якога ніхто ня можа «нахіліць».

Глядзець камэнтары (5)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG