Лінкі ўнівэрсальнага доступу

Аляксандар Лукашэнка, архіўнае фота

Рэфэрэндуму ня будзе. Лукашэнка выступіў са штогадовым пасланьнем да дэпутатаў і народу. Цытаты і камэнтары

Аляксандар Лукашэнка 24 сакавіка выступае са штогадовым — ужо 22-м — пасланьнем да беларускага народу і Нацыянальнага сходу. Выступ доўжыўся 80 хвілін. Свабода выбрала самае важнае.

«Таптаньне на месцы»: Штогадовыя пасланьні Лукашэнкі пятага прэзыдэнцкага тэрміну

Два гады таму першае пасланьне Аляксандра Лукашэнкі на пятым прэзыдэнцкім тэрміне было даволі кароткім (паўтары гадзіны) і даволі кансэрватыўным, сэнсацыйных заяваў не прагучала. Год таму пасланьне было ўжо даўжэйшым (дзьве з паловай гадзіны), запомнілася хутчэй кур’ёзамі: «Мясьніковіча вешалі», «Макей высах», «Коля сьпіць на ўроках​»…

Лідэр Беларускага нацыянальнага кангрэсу Мікола Статкевіч заявіў, што, паводле інфармацыі «з розных крыніц», Лукашэнка 24 красавіка агучыць пытаньні заплянаванага рэфэрэндуму.

Пра перабудову

«Савету міністраў неабходна правесьці пераатэстацыю ўсіх кіраўнікоў — дырэктараў, міністраў. Усе мусяць адпавядаць патрабаваньням новага часу. Дзяржаўны апарат таксама мусіць перабудоўвацца — там павінны працаваць найлепшыя людзі, прафэсіяналы», — заявіў Лукашэнка.

Ужо каторы год у пасланьнях Лукашэнкі ставіцца задача аддзяліць дзяржаўнае кіраваньне эканомікай ад камэрцыйнай дзейнасьці канкрэтных прадпрыемстваў. І каторы год нічога не мяняецца.

Лукашэнка кажа пра тое, што эканоміка павінна расьці, каб «даганяць разьвітыя краіны». На самай справе, апошнія 6 гадоў эканоміка Беларусі толькі падала, павялічваючы сваё адставаньне. ВУП Беларусі ў 2016 годзе ў далярах (5092) — меншы, чым у 2008 годзе (6367). Сярэдні заробак таксама цяпер яшчэ не дасягнуў узроўню 2010 году, тых самых славутых абяцаных «па пяцьсот» няма.

Пра ІТ-краіну

Лукашэнка нагадаў, што вядзецца праца на актуалізацыю заканадаўства аб разьвіцьці прадпрымальніцтва і папярэдзіў, каб чыноўнікі ня ўмешваліся са сваёй «самадзейнасьцю».

«Вымалёўваюцца контуры ІТ-краіны, што дазволіць нам заняць пачэснае месца ў глябальных працэсах. Беларусь павінна стаць правабным пунктам на мапе сьвету. І, дарэчы, чаму сёньня нашым людзям выгадна лятаць адкуль заўгодна — зь Вільні, з Кіева — толькі ня зь Менску. Так быць не павінна».

Раманчук: З рэцэсіі выходзім, але ня дзякуючы ўладам

Яраслаў Раманчук
Яраслаў Раманчук

Яраслаў Раманчук, кіраўнік фонду Мізэса, камэнтуе Лукашэнку:

«Так, з рэцэсіі пакрыху выходзім. Але дзякуючы выключна спрыяльным вонкавым фактарам. Найперш праз тое, што не патрабуе эканамічнай палітыкі: росту цэнаў на сусьветным рынку на нафтапрадукты і калійныя ўгнаеньні. Гэта ўсё дзякуючы нашай прыродзе, нашай зямлі».

«Прырост ВУП у 100 мільярдаў даляраў за пяцігодку атрымаць можна. Але пры адной умове — прэм’ерам стану я, а Кабякоў пойдзе ў адстаўку».

Пра рост лічбавай эканомікі

Лукашэнка заявіў, што экспарт Парку высокіх тэхналёгій за год вырас на 25%. Да падпісаньня ўказу аб лічбавай эканоміцы рэзыдэнтам парку станавілася 1 кампанія ў месяц, а пасьля ўстуленьня ў сілу дакумэнта за тры месяцы ад пачатку году — ужо больш за паўсотні суб’ектаў.

Ставіцца задача разьвіцьця фінансавага рынку. Але для гэтага патрэбна стварэньне паўвартасных рынкавых інстытутаў. Напрыклад, фарміраваньне фондавага рынку. А гэта несумяшчальна зь беларускай сацыяльнай мадэльлю зь вялізным дзяржаўным сэктарам эканомікі.

Пра рэфэрэндум

«Пра рэфэрэндум па зьмене нормаў Асноўнага закону я нават ня думаў. Я ніколі не парушу сваю клятву, а то будзе, як учора ў Армэніі. Нам зараз не да рэфэрэндуму. Нам галоўнае выстаяць, а не каб муць падняць у краіне. Вы ж бачыце, хто патрабуе зьменаў. Яны ж ня будуць адказваць, якія наступствы будуць мець зьмены Канстытуцыі. Трэба спыніць гэтае бражэньне ў грамадзтве».

Пра падзел паўнамоцтваў і Майдан

Жыцьцё мяняецца, павінны мяняцца і законы, адзначыў Лукашэнка. Але гэта тычыцца дробных нормаў, якія наўпрост не ўплываюць на жыцьцё людзей. Лукашэнка прызнаў, што частку паўнамоцтваў можна перадаць іншым галінам улады, а ў яго тым часам зьяўляюцца новыя клопаты.

«Але калі хтосьці разьлічвае, што будзе створаны падмурак для майданаў і майданутых, то гэтага ня будзе», — запэўніў Лукашэнка.

Сяргей Чалы, эканаміст, камэнтуе заявы Лукашэнкі пра ІТ-краіну

Сяргей Чалы
Сяргей Чалы

«На пытаньне пра тое, ці можа Беларусь стаць ІТ-краінай, вельмі добра днямі адказаў на форуме ў Менску Сол Сінгэр з Ізраілю. Ён адзначыў, што ў Ізраілі гэта вяршыня айсбэрга: велізарныя інфраструктуры, моцныя эканомікі, добрая адукацыя, добрая ахова здароўя.

Гэтыя рэчы растуць зьнізу ўверх. А вырашаць іх праз насаджваньне тэхналягічных паркаў, як у нас звычайна дзейнічае дзяржава, зьверху ўніз, верагодна няправільна».

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG