Лукашэнка вызваліў ад пасады амбасадара Беларусі ў Польшчы

Адпаведны ўказ апублікаваны на Нацыянальным прававым інтэрнэт-партале 14 траўня.

У якасьці абгрунтаваньня ўказаны пункт 20 арт.84 Канстытуцыі Беларусі — гэты артыкул дае права Аляксандру Лукашэнку прызначаць і адклікаць дыпляматычных прадстаўнікоў Беларусі ў замежных дзяржавах і пры міжнародных арганізацыях.

Уладзімер Чушаў займаў пасаду амбасадара Беларусі ў Польшчы з сакавіка 2019 году.

У кастрычніку 2020 году Польшча і Беларусь узаемна адклікалі амбасадараў: амбасадар Польшчы ў Беларусі Артур Міхальскі, як і амбасадар Беларусі ў Польшчы Уладзімер Чушаў, вярнуліся ў свае краіны «для кансультацый». Гэта адбылося на фоне абвастрэньня стасункаў паміж краінамі пасьля прэзыдэнцкіх выбараў 2020 году. Тады беларускае МЗС запатрабавала ад дыпляматычных прадстаўніцтваў Польшчы і Літвы істотна скараціць колькасьць супрацоўнікаў у краіне.

Беларусь у Польшчы з тых часоў прадстаўляў павераны ў справах амбасады Беларусі ў Варшаве.

ГЛЯДЗІЦЕ ТАКСАМА:

«Мы на ўсю моц адчуем нэгатыў ад зьнікненьня такіх сувязяў». У 2021 годзе Лукашэнка не прызначыў ніводнага амбасадара ў краіны ЭЗ

ГЛЯДЗІЦЕ ТАКСАМА:

«Амбасадары за мяжой — гэта адвакаты». Беларусь мае 58 амбасадаў: чым яны займаюцца

ГЛЯДЗІЦЕ ТАКСАМА:

Спэцпасланьнік Францыі па Беларусі: «Час гаварыць з рэжымам не прыйшоў, мы павінны заставацца на баку беларускага народу»