Лінкі ўнівэрсальнага доступу

Сьвятлана Ціханоўская: «Вобраз Беларусі як мірнай і дружалюбнай краіны разбураны канчаткова»


Сьвятлана Ціханоўская

Беларуская апазыцыйная лідэрка выказалася пра магчымы ўдзел Беларусі ў ваенным канфлікце. Заяву распаўсюдзіла прэсавая служба Ціханоўскай.

Сьвятлана Ціханоўская з нагоды прыбыцьця расейскіх войскаў у Беларусь на манэўры ля ўкраінскай мяжы заявіла, што дэмакратычныя сілы катэгарычна супраць удзелу Беларусі ў ваенным канфлікце на чыім-небудзь баку.

«Гэта супярэчыць імкненьню да нэўтралітэту, закладзенаму ў дзейнай вэрсіі Канстытуцыі. Нагадаю, што яна яшчэ не скасаваная. Мы з трывогай адзначаем, што стан вайсковай эскаляцыі робіцца нормай для рэжыму. Лукашэнка ня здольны вырашаць эканамічныя праблемы, таму шукае ворагаў і адкладае рэформы. Гэта пагаршае і без таго няпростае становішча грамадзянаў Беларусі. Мы заклікаем пачаць вырашаць унутраныя праблемы краіны, а ня ўмешвацца ў чужыя канфлікты».

Офіс Ціханоўскай катэгарычна супраць уцягваньня Беларусі ў «гібрыдны канфлікт, які зараз разьвязваецца супраць Украіны».

«Рэжым запрашае расейскія войскі на тэрыторыю Беларусі ў пэрыяд палітычнага абвастрэньня, што ўжо зьяўляецца недружалюбным крокам у адносінах да Ўкраіны. Вобраз Беларусі як мірнай і дружалюбнай краіны разбураны канчаткова».

Ціханоўская лічыць, што рэгулярнае зьяўленьне на тэрыторыі Беларусі замежных войскаў нясе пагрозу незалежнасьці краіны і павялічвае напружанасьць у рэгіёне, што не адпавядае нацыянальным інтарэсам Беларусі.

«Межы і тэрытарыяльная цэласнасьць дзяржаў павінны быць недатыкальнымі. Мы асуджаем любыя спробы замахаў на чужую тэрыторыю. Мы заклікаем вырашаць усе канфлікты шляхам дыялёгу без пагроз ужываньня сілы або дэманстрацыі ваенных падрыхтовак».

Ціханоўская нагадала, што Лукашэнка «пацярпеў паразу на мінулых прэзыдэнцкіх выбарах», а таму ня мае права прадстаўляць дзяржаву ва ўнутранай і зьнешняй палітыцы, у тым ліку абвяшчаць і праводзіць вайсковыя вучэньні.

Пагроза нападу Расеі на Ўкраіну

  • А 5-й гадзіне раніцы 24 лютага кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Усе дні вайны ідуць абстрэлы ўкраінскіх гарадоў ракетамі, налятае авіяцыя. Расейскія войскі атакуюць у тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, апазыцыя лічыць тэрыторыю Беларусі акупаванай і заклікае да супраціву расейскім захопнікам.
  • 27 лютага ва Ўкраіне стварылі Інтэрнацыянальны легіён Тэрытарыяльнай абароны, далучацца да якога заклікалі замежных добраахвотнікаў. Туды ўвайшлі і беларусы. За два з паловай месяцы вайны на фронце загінулі шасьцёра беларускіх добраахвотнікаў і жаўнераў УСУ: Аляксей «Тур» Скобля, Ільля «Літвін» Хрэнаў, Зьміцер «Тэрор» Апанасовіч, Зьміцер «Ганс» Рубашэўскі, Канстанцін «Фэнікс» Дзюбайла і Павал «Волат».
  • 30 сакавіка ААН зацьвердзіла склад незалежнай камісіі, якая зоймецца расьсьледаваньнем расейскіх ваенных злачынстваў ва Ўкраіне. У яе ўвайшлі людзі, якія працавалі ў разборы канфліктаў у Руандзе і Босьніі і Герцагавіне.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў. Расейцы выкарыстоўваюць забароненую зброю, у тым ліку касэтныя бомбы супраць мірнага насельніцтва.
  • Колькасьць уцекачоў з Украіны перавысіла 5,5 млн чалавек.
  • 1 красавіка Літва стала першай краінай Эўразьвязу, якая цалкам адмовілася ад расейскага газу. За яе прыкладам рушылі Латвія і Эстонія. Нямеччына да канца 2022 году паабяцала цалкам прыпыніць выкарыстаньне расейскай нафты.
  • 2 красавіка, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы. Таксама вядома пра шэраг згвалтаваньняў, у тым ліку немаўляці.
  • У красавіку ракетных атак на Ўкраіну і авіяўдараў з тэрыторыі Беларусі стала меней, расейскія войскі пачалі пакідаць Беларусь.
  • Ад пачатку расейскага поўнамаштабнага ўварваньня ва Ўкраіну загінулі ўжо 26 прадстаўнікоў мэдыя — 19 журналістаў і 7 работнікаў іншых напрамкаў.
  • Украінцы ў траўні распачалі контранаступ на Слабажаншчыне, выціскаючы захопнікаў да іх межаў.
  • 9 траўня прэзыдэнт ЗША падпісаў закон аб лэнд-лізе. Гэты закон аднаўляе праграму часоў Другой сусьветнай вайны, якая дазволіць паскорыць пастаўкі Ўкраіне зброі і павялічыць аб’ёмы такой дапамогі.
  • У ноч на 17 траўня намесьніца міністра абароны Ўкраіны Ганна Маляр пацьвердзіла пачатак апэрацыі па выратаваньні ўкраінскіх вайскоўцаў, якія апынуліся ў пастцы на тэрыторыі «Азоўсталі». Паводле яе слоў, адтуль у лячэбную ўстанову акупаванага Новаазоўска былі эвакуяваныя 53 цяжка параненыя. Яшчэ 211 чалавек былі дастаўленыя ў Аленіўку па гуманітарным калідоры. Міністэрства абароны Расеі заяўляе, што амаль 1000 украінскіх байцоў на заводзе «здаліся» па стане на 18 траўня. Міжнародны Чырвоны Крыж афіцыйна зарэгістраваў гэтых байцоў у якасьці ваеннапалонных.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, пакуль немагчымая.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG