Лінкі ўнівэрсальнага доступу

Хроніка перасьледу 17 студзеня: у Мазыры пакаралі яшчэ 2 футбольных фанатаў, адзін зь іх непаўналетні


Суд Фрунзэнскага раёну Менску. Ілюстратыўнае фота

Беларусаў працягваюць перасьледаваць за іх грамадзянскую пазыцыю. Свабода вядзе хроніку рэпрэсій.

Хроніка перасьледу 17 студзеня: двух футбольных фанатаў у Мазыры пакаралі 1,5 гадамі калёніі, адзін зь іх непаўналетні

14 студзеня суд Мазырскага раёну вынес прысуд у справе Мікіты Сілівона і Максіма Куксачэнкі.

Хлопцаў абвінавацілі паводле двух крымінальных артыкулаў — ч. 1 арт. 342 «Арганізацыя і падрыхтоўка дзеяньняў, якія груба парушаюць грамадзкі парадак, альбо актыўны ўдзел у іх» і арт. 364 «Гвалт альбо пагроза ўжываньня гвалту ў дачыненьні да супрацоўніка органаў унутраных спраў».

У выніку 17-гадоваму Максіму Куксачэнку прысудзілі 1 год і 6 месяцаў выхаваўчай калёніі, а 18-гадоваму Мікіту Сілівону 1 год і 6 месяцаў калёніі агульнага рэжыму. На абодвух у залі суду надзелі кайданкі.

Праваабарончы цэнтар «Вясна» зазначае, што падрабязнасьцяў з залі суду мала, але вядома, што справа Сілівона і Куксачэнкі амаль ідэнтычная справе футбольных фанатаў Данілы Скіпальскага, Аляксандра Сузько, Паўла Дворака, Аляксандра Цімашэнкі і Кірыла Канапацкага. Летась 23 лістапада пяцёх гэтых юнакоў таксама абвінавацілі па ч.1. арт 342 і арт. 364 КК і пакаралі пазбаўленьнем волі на тэрміны ад 3 да 3,5 года.

На бацькоў абаронцы дубоў Аляксандра Дземчука чыняць ціск


На бацькоў Аляксандра Дземчука, які адбывае 30-суткавы арышт за спробу абараніць старажытныя дубы ў вёсцы Ахова, чыняць ціск, паведамляе Радыё Рацыя. Перадусім сваякоў запужваюць тым, што кантакты з грамадзянскай супольнасьцю толькі нашкодзяць. Таксама, па папярэдніх зьвестках, Дземчука ўжо звольнілі з пасады дырэктара Ахоўскага Дома культуры.

На працягу мінулага году Дзямчук зь вяскоўцамі-аднадумцамі дабіваўся захаваньня 300-гадовых дубоў на ахоўскіх могілках. Іх прызналі надзвычай аварыйнымі, і мясцовыя ўлады пастанавілі зрэзаць дрэвы. 22 сьнежня, калі справа дайшла да ліквідацыі, Дземчук паспрабаваў перашкодзіць камунальнікам, за што і быў затрыманы міліцыянтамі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG