Лінкі ўнівэрсальнага доступу

У Польшчы пацьвердзілі сьмерць мігранткі з Курдыстану, якая апошнія дні правяла ў шпіталі


Калючы дрот на беларуска-польскай мяжы

Абставіны сьмерці жанчыны дасьледуе польская пракуратура. Раней у мігранткі памерла дзіця.

6 сьнежня пракуратура Гайнаўкі афіцыйна пачне сьледзтва ў справе сьмерці жанчыны з Курдыстану ў шпіталі, куды трапіла з памежнай паласы, інфармуе Радыё Беласток. Пра пачатак сьледзтва расказаў кіраўнік пракуратуры Ян Андрэйчук.

Пракуратура атрымала інфармацыю пра сьмерць курдкі 3 сьнежня пасьля 21-й гадзіны. Першай з чыноўнікаў факт сьмерці пацьвердзіла прэс-сакратарка Падляскага аддзелу Памежнай варты Катажына Здановіч.

Жанчыну з ірацкага Курдыстану адвезьлі з Гайнаўкі ў мэдычны шпіталь Беластоку, каб правесьці неабходныя дасьледаваньні цела і высьветліць дакладныя прычыны сьмерці. Пакуль абставінамі займаецца паліцыя, якая і перадасьць пракуратуры ўсе дакумэнты і пратаколы апытаньня сьведак. Таксама туды паступяць мэдычныя матэрыялы.

Пакуль вядома, што жанчына разам са сваімі землякамі правяла пэўны час у памежнай паласе з боку Беларусі. Яна была цяжарнай, яе дзіця памерла. Жанчыну ў цяжкім стане даставілі ў шпіталь, а ненароджанае дзіця пахавалі ў Баброўніках на мусульманскіх могілках. У сям’і засталіся муж і пяцёра іншых дзяцей, якім зараз аказваюць псыхалягічную дапамогу.

За ўвесь час мігранцкага крызісу яго ахвярамі сталі ўжо як мінімум 17 чалавек.

Колькі жыцьцяў забраў мігранцкі крызіс

4 жніўня мігрант з Іраку памёр на беларуска-літоўскай мяжы непадалёк ад пункту пропуску «Беняконі». Мужчыну ў перадсьмяротным стане нібыта знайшоў былы вайсковец, які жыве ў Воранаве. СК Беларусі адразу завёў крымінальную справу, у Беларусь выклікалі родных памерлага, мёртвае цела паказалі на беларускіх дзяржаўных тэлеканалах. Літоўскі бок абвінаваціў беларускія ўлады ў правакацыі.

19 верасьня ў Польшчы на мяжы знайшлі трох загінулых мігрантаў. Зь беларускага боку знайшлі цела жанчыны. Аднаго зь мігрантаў, 37-гадовага Мустафу Махамэда, пахавалі на мусульманскіх могілках у вёсцы падляскіх татараў Багоніках 21 лістапада.

7 кастрычніка дзяржаўныя СМІ Беларусі напісалі, што ля беларуска-літоўскай мяжы яшчэ 5 кастрычніка знойдзена цела ўцекача з Шры-Ланкі. Побач з загінулым знаходзіліся ягоныя дакумэнты, плястыкавыя карткі і мабільны тэлефон. Прычыны сьмерці мігранта не ўдакладняліся.

14 кастрычніка ў памежнай зоне з польскага боку знайшлі яшчэ аднаго мёртвага мігранта з Сырыі. Прэс-сакратар паліцыі Томаш Крупа сказаў Gazeta Wyborcza, што загінулы — 24-гадовы ўцякач, да гэтага ён, імаверна, знаходзіўся на тэрыторыі Беларусі. Пры сабе ён меў беларускую візу, выдадзеную ў сярэдзіне верасьня.

19 кастрычніка сырыец патануў у рацэ Буг пры спробе пераплысьці на польскі бок мяжы. Яму было 19 гадоў. Пахаваны ў Багоніках 15 лістапада.

22 кастрычніка непадалёк ад Кузьніцы знайшлі цела мігранта. Паліцыя не змагла даведацца ягонага імя. 18 лістапада яго пахавалі ў Багоніках.

29 кастрычніка на мяжы памёр хворы на дыябэт 25-гадовы мігрант з Ірацкага Курдыстану.

12 лістапада ў лесе каля польскай вёскі Вулька Церахоўская непадалёк ад мяжы зь Беларусьсю знайшлі цела 20-гадовага сырыйца. Зь беларускага боку мяжы знаходзіцца Камянецкі раён Берасьцейскай вобласьці.

22 лістапада стала вядома, што ва ўлоньні мігранткі на 24-м тыдні цяжарнасьці памерла ненароджанае дзіця. Маці двума тыднямі раней даставілі з-пад беларускай мяжы ў шпіталь. Паводле мусульманскага звычаю, мёртванароджанае дзіця пахавалі ў асобнай магіле ў Багоніках. Сама жанчына была ў цяжкім стане і 3 сьнежня ўвечары памерла.

27 лістапада на ўчастку памежнай заставы «Відзы» Полацкага памежнага атраду знайшлі труп мігранта ўзростам каля 30 гадоў.

28 лістапада знайшлі яшчэ адзін труп мужчыны неславянскай зьнешнасьці на мяжы зь Літвой.

Таксама зьяўляліся паведамленьні пра гібель мігрантаў зь «беларускага маршруту» не на мяжы. Адзін памёр у Менску, дваіх знайшлі нежывымі ў Нямеччыне.

Такім чынам, вядома пра сьмерць

• 13 мігрантаў на мяжы,
• 1 ненароджанага дзіцяці,
• 3 мігрантаў у іншых пунктах «беларускага маршруту».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG