Лінкі ўнівэрсальнага доступу

Iraqi Airways атрымала дазвол на рэйсы ў Менск для рэпатрыяцыі грамадзян Іраку зь беларуска-польскай мяжы


Ірак вырашыў рэпатрыяваць сваіх грамадзян, якія жадаюць пакінуць польска-беларускую мяжу.

Кампанія Iraqi Airways, якая прыпыніла палёты ў Менск яшчэ ў жніўні, атрымала дазвол на палёты ў Беларусь для вывазу грамадзян Іраку на радзіму, паведамляе Голас Амэрыкі.

Прадстаўнік МЗС Іраку заявіў, што дыпляматычнае ведамства складае сьпісы грамадзян Іраку, якія апынуліся ў бязвыхадным становішчы на мяжы паміж Беларусьсю і Польшчай і добраахвотна жадаюць зьехаць на радзіму.

«Мы гатовы арганізаваць не адзін рэйс, каб тэрмінова адрэагаваць на [просьбы] усіх, хто хоча вярнуцца дадому добраахвотна», — сказаў афіцыйны прадстаўнік ірацкага Міністэрства замежных спраў Махамэд ас-Сагаф.

Сотні нелегальных мігрантаў і патэнцыйных просьбітаў прытулку, многія зь якіх зьяўляюцца курдамі з Іраку, аказаліся заблякаваныя на мяжы Беларусі і Польшчы ў той час, калі слупок тэрмомэтра ў гэтым раёне набліжаецца да 0 градусаў па Цэльсію. Сусьветная арганізацыя аховы здароўя заявіла ў пятніцу, што «вельмі занепакоеная» цяжкім становішчам бежанцаў на мяжы паміж Польшчай і Беларусьсю.

Польшча адмаўляецца дазволіць ім перасячы мяжу, а Захад абвінавачвае Аляксандра Лукашэнку ў тым, што ён завозіць нелегальных мігрантаў у сваю краіну для адпраўкі іх у Эўразьвяз у адплату за ўведзеныя супраць Менску санкцыі.

Супрацоўнікі пасольстваў Іраку з Масквы і Варшавы накіраваліся да мяжы, каб «праверыць бясьпеку (умоў, у якіх знаходзяцца мігранты) і зьвязацца зь мясцовымі ўладамі», сказаў Сагаф.

Беларускія дыпляматычныя місіі ў Багдадзе і ў рэгіянальнай сталіцы Курдыстану Эрбіле, якія выдавалі іракцам турыстычныя візы, былі «часова закрытыя» на мінулым тыдні, дадаў ён.

Ірацкая авіякампанія Iraqi Airways прыпыніла «на нявызначаны тэрмін» рэйсы паміж Багдадам і Менскам яшчэ ў жніўні, паведаміў афіцыйны прадстаўнік авіякампаніі Гусэйн Джаліль.

«Але мы атрымалі дазвол на выкананьне палётаў у адзін бок паміж Менскам і Багдадам для заблякіраваных» у Беларусі іракцаў, дадаў ён.

У апошнія тыдні патэнцыйныя мігранты былі вымушаныя дабірацца да Беларусі праз трэція краіны, звычайна — праз Турэччыну. Аднак Турэччына ў пятніцу ўвяла забарону для грамадзян Сырыі, Іраку і Емэну на пасадку на борт самалётаў, што вылятаюць у Беларусь.

Віцэ-прэзыдэнт Эўрапейскай камісіі Маргарыціс Схінас у панядзелак адправіцца ў Багдад для перамоваў наконт гуманітарнага крызісу, які працягваецца.

Міграцыйны крызіс — 2021. Асноўнае

  • У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
  • Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
  • Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
  • У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
  • Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
  • Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
  • Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
  • 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
  • 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
  • На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
  • 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
  • У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
  • 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
  • 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
  • 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
  • Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
  • 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
  • Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
  • 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
  • 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.
  • На больш чым дзесяці эвакуацыйных рэйсах у Ірак і Сырыю ў лістападзе-сьнежні Беларусь пакінулі каля 4,5 тысяч мігрантаў.
  • На пачатку 2022 году сталі вядомыя тэрміны пабудовы агароджаў на мяжы зь Беларусьсю. Польшча адзначыла, што агароджу дабудуюць да канца чэрвеня, а Літва, што да восені.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG