Лінкі ўнівэрсальнага доступу

У Нью-Ёрку закрылі генэральнае консульства Беларусі


Нью-Ёрк

Раней у гэтым месяцы стала вядома, што конульства спыняе працу на патрабаваньне амэрыканскага боку.

Генэральнае консульства Беларусі ў Нью-Ёрку закрылася ў адпаведнасьці з пастановай Савету Міністраў Беларусі, якую падпісаў прэм’ер-міністар Раман Галоўчанка, перадае ТАСС.

Адпаведны дакумэнт апублікаваны ў сераду на нацыянальным прававым інтэрнэт-партале.

«Закрыць да 20 кастрычніка 2021 году генэральнае консульства Рэспублікі Беларусь у г. Нью-Ёрку (Злучаныя Штаты Амэрыкі)», — гаворыцца ў дакумэнце.

Генэральнае консульства раней паведаміла, што спыняе працу 21 кастрычніка на патрабаваньне амэрыканскага боку. Грамадзяне Беларусі, якія жывуць на тэрыторыі консульскай акругі генэральнага консульства, уключаючы Канаду, пасьля яго закрыцьця змогуць зьвяртацца ў амбасаду Беларусі ў ЗША.

МЗС Беларусі выказаў шкадаваньне ў сувязі з патрабаваньнем Вашынгтону закрыць консульства ў Нью-Ёрку.

Сёлета ўлетку, пасьля аднаўленьня амэрыканскіх санкцый у дачыненьні да Менску, МЗС Беларусі прапанаваў ЗША да 1 верасьня скараціць колькасьць свайго прадстаўніцтва ў Менску да пяці чалавек. Таксама беларускі бок адклікаў раней выдадзеную згоду на прызначэньне Джулі Фішэр паслом ЗША ў Беларусі.

Што варта ведаць пра санкцыі ЗША

Першыя санкцыі, якія ўвяла адміністрацыя прэзыдэнта Джорджа Буша пасьля прэзыдэнцкіх выбараў у Беларусі ў 2006 годзе, прадугледжвалі блякаваньне ўласнасьці і актываў групы высокіх чыноўнікаў, уключна з Аляксандрам Лукашэнкам. Санкцыі распаўсюджваліся таксама і на сем’і гэтых чыноўнікаў. Ім таксама забаранілі ўезд на тэрыторыю ЗША.

Пазьней асобам, у тым ліку і новым, якія папоўнілі сьпісы, забаранілі мець актывы на тэрыторыі ЗША і весьці бізнэс з амэрыканскімі партнэрамі.

Пасьля прэзыдэнцкіх выбараў у Беларусі напрыканцы 2010 году ЗША пашырылі сьпіс беларускіх чыноўнікаў, якім забаронены ўезд у ЗША. Акрамя таго, грамадзянам ЗША забаранілі весьці бізнэс зь дзяржаўным канцэрнам «Белнафтахім» і шэрагам іншых прадпрыемстваў. Гэтак Злучаныя Штаты адрэагавалі на рэпрэсіі пасьля выбараў, у тым ліку на зьняволеньне шэрагу кандыдатаў у прэзыдэнты.

Пра якія беларускія прадпрыемствы ідзе гаворка

  • «Белнафтахім»,
  • «Белнафтахім ЗША»,
  • «Нафтан»,
  • «Беларускі нафтавы гандлёвы дом»,
  • «Белшына»,
  • «Гродна Азот»,
  • «Гроднахімвалакно»,
  • ААТ «Лякафарба»,
  • ААТ «Полацак-Шкловалакно».

Прадпрыемствам i грамадзянам ЗША было забаронена ўступаць у эканамічныя і фінансавыя дачыненьні з гэтымі арганізацыямі, а ўся іх маёмасьць і рахункі, якія знаходзяцца на тэрыторыі ЗША, былі замарожаныя. Да таго ж многія краіны і кампаніі адмаўляюцца працаваць з прадпрыемствамі, якія знаходзяцца пад санкцыямі ЗША.

  • У кастрычніку 2015 году Міністэрства фінансаў ЗША прыпыніла санкцыі супраць гэтых дзевяці беларускіх прадпрыемстваў у сувязі з «пэўным прагрэсам у сфэры дэмакратыі і правоў чалавека», а таксама з мэтай падтрымкі незалежнасьці і сувэрэнітэту Беларусі.
  • Пасьля прэзыдэнцкіх выбараў у Беларусі ў жніўні 2020 году і рэпрэсій, якія адбыліся пасьля іх, ЗША аднавілі санкцыі ад 3 чэрвеня 2021 году. Адпаведнае рашэньне 19 красавіка 2021 году апублікавала Міністэрства фінансаў ЗША.​ Злучаныя Штаты дабіваюцца вызваленьня ўсіх палітвязьняў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG