Лінкі ўнівэрсальнага доступу

Хроніка перасьледу 15 кастрычніка: Палітвязень Фурманаў ня выйшаў з ШЫЗА, за допісы ў Telegram судзяць ураджэнку Ўзбэкістану


Суд Фрунзэнскага раёну Менску. Ілюстрацыйнае фота

Карныя органы ў Беларусі працягваюць перасьледаваць беларусаў за пратэсты супраць дзейнай улады. Свабода вядзе хроніку рэпрэсій.

Вілейскаму актывісту Андрэю Кудзіку прысудзілі 90 сутак арышту. Пра гэта піша «Вясна» са спасылкай на інфармацыю атрыманую ад сяброў Андрэя.

Паводле праваабаронцаў, Кудзіка затрымалі 9 жніўня. Пакуль ён знаходзіцца ў ізалятары ў Смалявічах, але магчыма, што яго вернуць ў вілейскі ІЧУ.

Палітвязень Фурманаў ня выйшаў з ШЫЗА

Палітзьняволенага Дзьмітрыя Фурманава ня выпусьцілі са штрафнога ізалятару пасьля адбыцьця там пакараньня цягам 38 дзён. Як паведамляе тэлеграм-канал «Право имеют», у панядзелак яго зноў зьмясьцілі ў ШЫЗА. Прычына пакуль невядомая.

Дзьмітрыя Фурманава затрымалі 29 траўня 2020 году на пікеце Сьвятланы Ціханоўскай у Горадні. Ён зьбіраў за яе подпісы як сябра ініцыятыўнай групы. Калі на Савецкай плошчы пачалася тузаніна і міліцыянт апынуўся на зямлі, затрымалі Сяргея Ціханоўскага і ягоных паплечнікаў. У гэты момант невядомыя схапілі Фурманава з-за стала разам з крэслам на вачах у бацькоў, выцялі па твары і завезьлі ў міліцыю.

Фурманаў атрымаў два гады калёніі агульнага рэжыму за «арганізацыю дзеяньняў, якія груба парушаюць грамадзкі парадак». Ён некалькі разоў галадаваў у няволі на знак пратэсту. Мінулым летам разам зь ім пад сьценамі «Валадаркі» галадалі ягоная маці і дзяўчына. Пасьля пераліку тэрміну паводле новага заканадаўства Дзьмітры павінен выйсьці не ў канцы траўня 2022 году, а сёлета ў канцы кастрычніка.

Пачаўся суд над ураджэнкай Узбэкістану, якую вінавацяць паводле трох артыкулаў


У судзе Полацку і Полацкага раёну 14 кастрычніка пачаўся разгляд крымінальнай справы 52-гадовай прадавачкі Зухры Берасьневай, якая абвінавачваецца адразу па трох артыкулах КК: абраза прадстаўніка ўлады (арт. 369), гвалт альбо пагроза ўжываньня гвалту ў дачыненьні да супрацоўніка органаў унутраных спраў (арт. 364) і паклёп (арт. 188).

Справу разглядае судзьдзя Андрэй Дзергачоў. Дзяржаўнае абвінавачваньне прадстаўляе памочнік пракурора Мікіта Белавусаў, паведамляе Праваабарончы цэнтар «Вясна».

Ураджэнку Ўзбэкістану абвінавацілі ў тым, што яна 22 кастрычніка 2020 году публічна абразіла начальніка і супрацоўнікаў Полацкага РАУС Аляксандра Гаруса, Віталя Шашукова і Дзяніса Карасёва. Прычынай стала паведамленьне, якое Зухра Берасьнева пад нікнэймам «Ачумець» пакінула ў тэлеграм-суполках «Новополоцк97» і «Полоцк97». Згодна з заключэньнем судова-лінгвістычнай экспэртызы, яно зьмяшчае нэгатыўную ацэнку гэтых супрацоўнікаў і зьяўляецца ненарматыўнай формай выказваньня, а таксама мае прыкметы вэрбальнай агрэсіі (арт. 369 КК).

Паводле сьледзтва, летась 22 кастрычніка жанчына таксама нібыта выказала пагрозу ў дачыненьні да начальніка аддзела аховы правапарадку аддзела прафіляктыкі грамадзкай бясьпекі падпалкоўніка Дзяніса Карасёва, якую ён успрыняў як рэальную.

23 кастрычніка яна разьмясьціла паведамленьне ў суполках «Наваполацк97» і «Полацк97» «Шакуноў брыдота, будзем зьнішчаць цябе да апошняга, цябе ... (нецэнзурнае слова)», якое нібыта зьмяшчае пагрозу ў адрас намесьніка начальніка Полацкага ІЧУ маёра Віталя Шашукова
18 сьнежня 2020 году Зухра пераслала публікацыю з суполкі «Чорная кніга Беларусі» пра сілавіка Дзяніса Карасёва ў чат «Стоп таракан. Свободу Сергею Тихановскому».

Зухра Берасьнева прызнала віну часткова. У самым пачатку паседжаньня жанчына адмовілася ад адваката.

Васьмёра новых палітвязьняў

Як паведамляе «Вясна», беларускія праваабаронцы абвясьцілі палітвязьнямі яшчэ васьмёра чалавек: Міхала Чамураку, Уладзімера Сушко, Аляксандра Літвішчанку, Аляксандра Жыхарэвіча, Аляксандра Курганскага, Аксану Касьпяровіч, Артура Жвірыдоўскага і Ігара Бузука. Агульны лік палітвязьняў у Беларусі: 812.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG