Лінкі ўнівэрсальнага доступу

«Паўночны паток — 2» пачалі напаўняць газам


Апошняя сэкцыя «Паўночнага патоку - 2» была пракладзеная ў жніўні

Апэратар газаправоду «Паўночны паток — 2», кампанія, якая належыць «Газпрому», у панядзелак паведаміла, што першая нітка трубаправоду з Расеі ў Нямеччыну па дне Балтыйскага мора пачала запаўняцца газам.

У паведамленьні кампаніі, якое цытуюць агенцтвы, гаворыцца, што на нітцы былі праведзеныя пусканаладачныя работы, і цяпер яна можа напаўняцца газам для пачатку тэхнічнага тэставаньня трубаправоду.

Раней у панядзелак Дацкае энэргетычнае агенцтва абвясьціла, што кампанія Nord Stream 2 выканала ўсе ўмовы для ўводу газаправоду — часткова ён праходзіць праз дацкія воды — у эксплюатацыю.

Калі газаправод будзе цалкам гатовы да пачатку паставак паліва — пакуль не паведамляецца. Акрамя тэхнічных работ, ня скончаны і працэс яго сэртыфікацыі. Нямецкія ўлады пачалі гэты працэс у верасьні, ён можа заняць 4 месяцы.

Газаправод «Паўночны паток — 2», пабудова якога была завершаная ў жніўні, стаў прадметам палітычнай барацьбы. Злучаныя Штаты, шэраг краін ЭЗ і Ўкраіна выступаюць супраць яго ўвядзеньня ў эксплюатацыю, баючыся, што ён стане інструмэнтам ціску Масквы на Эўропу. ЗША ўвялі шэраг санкцый у сувязі з пабудовай газаправоду. У апошнія месяцы цэны на газ на эўрапейскім рынку дасягнулі рэкордных значэньняў, і шэраг экспэртаў і палітыкаў асьцерагаюцца, што Расея будзе выкарыстоўваць гэтую сытуацыю, каб дамагчыся ад ЭЗ новых саступак у абмен на больш хуткае ўвядзеньне «Паўночнага патоку — 2» у эксплюатацыю.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG