Лінкі ўнівэрсальнага доступу

Міхаіл Саакашвілі заявіў, што вярнуўся ў Грузію, дзе ён прыгавораны да двух турэмных тэрмінаў


Міхаіл Саакашвілі

Былы прэзыдэнт Грузіі Міхаіл Саакашвілі паведаміў, што вярнуўся ў краіну. Пра гэта ён напісаў на сваёй старонцы ў Фэйсбуку.

«Добрай раніцы, Грузія. Восем гадоў прайшло», — напісаў ён.

Пазьней Саакашвілі выклаў відэазварот, у якім заявіў, што знаходзіцца ў Батумі.

У заснаванай ім партыі «Адзіны нацыянальны рух» паведамілі выданьню On.ge, што ня ведаюць падрабязнасьцяў вяртаньня Саакашвілі.

У МУС Грузіі заявілі, што Саакашвілі не перасякаў дзяржаўнай мяжы.

Раней былы прэзыдэнт Грузіі заявіў, што вернецца ў краіну ўвечары 2 кастрычніка. Ён сказаў, што ўзяў квіткі на самалёт з Кіева ў Тбілісі. Прэм’ер-міністар краіны Іраклій Гарыбашвілі заявіў, што пасьля прыбыцьця ў Грузію Саакашвілі «будзе арыштаваны і накіраваны ў турму».

  • Саакашвілі пакінуў Грузію ў 2013 годзе, адразу пасьля гэтага супраць яго распачалі чатыры крымінальныя справы. Ён знаходзіцца ў вышуку, яму вынесьлі шэраг прысудаў: праз абвінавачваньні ў арганізацыі расправы над удзельнікамі мітынгу 7 лістапада 2007 году, у супрацьпраўным ўварваньні ў будынак тэлеканалу «Імэды» і незаконным прысваеньні маёмасьці бізнэсоўца Бадры Патаркацышвілі, а таксама ў арганізацыі нападу на дэпутата Валерыя Гелашвілі ў 2005 годзе, перашкодзе расьсьледаваньню забойства банкіра Сандра Гіргвліяні і растраце дзяржаўных сродкаў у 2009-2012 гадах.
  • У 2018 годзе палітык у частцы гэтых спраў быў завочна асуджаны на тры гады турмы. Пазьней у 2018 годзе Генэральная пракуратура Грузіі таксама абвінаваціла Саакашвілі ў датычнасьці да забойства Патаркацышвілі.
  • У 2015 годзе былы прэзыдэнт Грузіі атрымаў украінскае грамадзянства па ўказе папярэдняга прэзыдэнта Пятра Парашэнкі, які прызначыў яго кіраўніком Адэскай абласной адміністрацыі. Аднак праз два гады адносіны Парашэнка і Саакашвілі разладзіліся і ўкраінскі прэзыдэнт прыпыніў дзеяньне ўказу аб наданьні палітыку грамадзянства. Тады ж Саакашвілі забаранілі ўезд на ўкраінскую тэрыторыю да 2021 году. Украінскае грамадзянства палітыку вярнуў толькі Ўладзімір Зяленскі, пасьля таго як выйграў выбары прэзыдэнта.
  • 7 траўня сёлета прэзыдэнт Украіны Ўладзімір Зяленскі сваім указам прызначыў Саакашвілі кіраўніком Выканаўчага камітэту рэформаў. Аднак на гэтай пасадзе Саакашвілі прапрацаваў менш за паўгода.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG