Лінкі ўнівэрсальнага доступу

Вярхоўная Рада Ўкраіны прыняла законапраект аб алігархах


Дах будынка Вярхоўнай Рады Ўкраіны

Вярхоўная Рада Ўкраіны прыняла ў канчатковым чытаньні законапраект аб алігархах, прапанаваны раней прэзыдэнтам Уладзімірам Зяленскім

За яго прыняцьце выказаліся 279 дэпутатаў пры неабходных 226. У падтрымку законапраекту галасавалі амаль усе прадстаўнікі прэзыдэнцкай партыі «Слуга народу», якая мае ў парлямэнце большасьць. Апазыцыя галасавала супраць, прычым як прыхільнікі былога прэзыдэнта Пятра Парашэнкі, гэтак і «Апазыцыйная плятформа — За жыцьцё», якая лічыцца прарасейскай.

Закон дае вызначэньне «алігарха» — гэта чалавек, які мае значную эканамічную і палітычную вагу ў грамадзкім жыцьці. Алігархам будуць называць асобу, якая адпавядае прынамсі тром прапісаным у законе крытэрам:

  • удзельнічае ў палітычным жыцьці;
  • мае значны ўплыў на СМІ;
  • зьяўляецца канчатковым бэнэфіцыярным уладальнікам прадпрыемства, які займае манапольнае становішча на рынку і на працягу году падтрымлівае або ўзмацняе такое становішча;
  • пацьверджаны кошт яго актываў павінен перавышаць 2 мільярды 270 мільёнаў грыўняў (каля 80 мільёнаў даляраў).

Рашэньне аб тым, каго лічыць алігархам, будзе прымаць Рада нацыянальнай бясьпекі і абароны. Яна будзе таксама весьці рэестар алігархаў. Людзям з гэтага рэестру будзе забаронена рабіць унёскі ў падтрымку палітычных партый, яны павінны будуць даваць справаздачу аб сваіх сустрэчах зь дзяржаўнымі службоўцамі і выконваць яшчэ шэраг патрабаваньняў.

Апазыцыя асьцерагаецца, што закон будзе ўжывацца супраць палітычных апанэнтаў дзейнай улады — у прыватнасьці, у адпаведнасьці зь ім алігархам можа быць прызнаны былы прэзыдэнт, лідэр партыі «Эўрапейская салідарнасьць», буйны бізнэсовец Пятро Парашэнка.

Кіраўнік Вярхоўнай рады Дзьмітры Разумкоў, які лічыў законапраект не гатовым да разгляду, цяпер на самаізаляцыі праз COVID-19, пасяджэньня Рады ён ня вёў. Разумкова публічна крытыкавалі прадстаўнікі «Слугі народу», у прэсе зьявіліся паведамленьні, што магчымая яго адстаўка.

Алігархамі ў Расеі, Украіне і іншых краінах традыцыйна называюць людзей, якія маюць значныя актывы і аказваюць уплыў на палітыку. Пры гэтым украінскія алігархі — да ліку якіх у розны час адносілі Рыната Ахметава, Ігара Каламойскага, Віктара Медзьведчука, Дзьмітрыя Фірташа, Віктара Пінчука, Пятра Парашэнку і іншых — як правіла, падтрымліваюць розныя палітычныя сілы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG