Лінкі ўнівэрсальнага доступу

ЗША, ЭЗ і Брытанія не прызналі выбары ў расейскую Думу на тэрыторыі Крыму


Уладзімір Пуцін абмяркоўвае вынікі выбараў з кіраўніцай ЦВК Элай Памфілавай

Краіны Эўразьвязу, ЗША і Вялікая Брытанія не прызнаюць вынікі і сам працэс галасаваньня на выбарах у Дзяржаўную Думу Расеі на тэрыторыі анэксаванага Крыму. Пра гэта сказана ў заявах зьнешнепалітычных ведамстваў ЭЗ, Брытаніі і ЗША. У іх падкрэсьліваецца, што міжнародная супольнасьць лічыць Крым сувэрэннай тэрыторыяй Украіны.

У заяве зьнешнепалітычнага ведамства ЭЗ таксама ўтрымліваецца асуджэньне ўдзелу ў выбарах жыхароў падкантрольных прарасейскім сэпаратыстам раёнаў Данецкай і Луганскай абласьцей Украіны.

ЭЗ, ЗША і Брытанія зьвяртаюць увагу на паведамленьні пра шматлікія парушэньні на выбарах у Дзярждуму, а таксама на тое, што яны праводзіліся ў атмасфэры ўзмоцненага ціску расейскіх уладаў на грамадзянскую супольнасьць і журналістаў.

У заяве Дзяржаўнага дэпартамэнту ЗША сказана, што законы аб «замежных агентах», экстрэмісцкіх і «непажаданых» арганізацыях абмяжоўваюць правы расейскіх грамадзян, у тым ліку выбарчыя. У выніку, як лічаць на Захадзе, магчымасьці выбару для расейцаў былі абмежаваныя. Краіны Захаду таксама асудзілі ўлады Расеі за адмову запрасіць назіральнікаў ад АБСЭ.

Пра непрызнаньне выбараў у Дзярждуму ў цэлым у заявах не гаворыцца. Раней Эўрапарлямэнт заклікаў ЭЗ не прызнаваць вынікі галасаваньня, калі яно ня будзе сумленным і празрыстым.

У Крыме праходзіць ужо ня першае галасаваньне на расейскіх выбарах пасьля анэксіі. Вынікі галасаваньня на выбарах у Думу ў 2016 годзе ў Крыме таксама не былі прызнаныя Захадам — на практыцы гэта азначала, напрыклад, тое, што выбраныя ў Крыме дэпутаты Думы не маглі ўключацца ў расейскія дэлегацыі ў міжнародных парлямэнцкіх асамблеях.

  • Паводле дадзеных ЦВК пасьля падліку амаль усіх бюлетэняў, у Думу праходзяць 5 партыяў, прычым уладная «Адзіная Расея» захоўвае канстытуцыйную большасьць. Прыхільнікі КПРФ, а таксама апазыцыянэра Аляксея Навальнага, вінавацяць улады ў фальсыфікацыі вынікаў галасаваньня ў Маскве — вынікі электроннага галасаваньня прыкметна адрозьніваюцца ад вынікаў галасаваньня на традыцыйных участках і забясьпечваюць перамогу праўладных кандыдатаў. Сама выбарчая кампанія прайшла пад знакам перасьледу прыхільнікаў Навальнага, якім не давалі ні балятавацца, ні агітаваць за падтрыманых імі кандыдатаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG