Лінкі ўнівэрсальнага доступу

Суд у Маскве прыпыніў рашэньне аб высылцы з Расеі беларускага коміка Мірзалізадэ


Ідрак Мірзалізадэ ў расейскім судзе. Жнівень 2021

Пасьля няўдалага жарту пра расейцаў коміка Ідрака Мірзалізадэ, які мае беларускае грамадзянства, прызналі непажаданым ў Расеі.

Замаскварэцкі суд Масквы суд прыпыніў рашэньне аб непажаданасьці знаходжаньня ў Расеі беларускага коміка Мірзалізадэ. Такім чынам, комік можа вярнуцца ў Расею, пакуль суд разглядае ягоны пазоў аб прызнаньні рашэньня паліцыі незаконным. Пра гэта паведаміў адвакат Ідрака Мірзалізадэ Сяргей Бадамшын.

Цяпер Мірзалізадэ патрабуе адмяніць рашэньне МУС Расеі аб пажыцьцёвым забароне на ўезд у краіну. Сваёй віну стэндапэр не прызнаў, але прынёс прабачэньні тым, каго пакрыўдзіў словамі з выступу.

Ідрак Мірзалізадэ нарадзіўся ў Азэрбайджане, а дзяцінства і юнацтва правёў у Беларусі. Па пашпарце ён беларус, па нацыянальнасьці — талыш. Пасля ўнівэрсытэту Ідрак пераехаў у Маскву, дзе гуляў у КВЗ і прымаў удзел у здымках камэдыйных шоў на расейскіх каналах.

За што і як пакаралі коміка

У канцы жніўня МУС Расеі абвясьціў аб пажыцьцёвай «непажаданасьці знаходжаньня» грамадзяніна Беларусі коміка Ідрака Мірзалізадэ ў Расеі.

«У сваім публічным выступе Ідрак Мірзалізадэ дапусьціў выразы, якія ўзбуджаюць нянавісьць і варожасьць да асобаў расейскай нацыянальнасьці, прыніжаюць іх чалавечую годнасьць. У сувязі з гэтым яго знаходжаньне на тэрыторыі Расейскай Фэдэрацыі прызнана такім, якое пагражае грамадзкаму парадку, правам і законным інтарэсам іншых асобаў», — заявіла паведамленьні ведамства.

Тады ў МУС Расеі таксама зазначылі, што лічаць «недапушчальнымі выказваньні, накіраваныя на дэстабілізацыю міжнацыянальных адносін, незалежна ад формы іх падачы».

У сакавіку 2021 году Мірзалізадэ атрымаў від на жыхарства ў Расеі.
10 жніўня Таганскі раённы суд Масквы арыштаваў коміка на 10 сутак за жарт аб арэндзе кватэры і расейцах. Ён расказаў гісторыю, як спрабаваў зьняць жыльлё і падчас агляду ўбачыў запэцканы калам матрац.

«Відаць, расейцы абмазваюцца г...ном і кладуцца спаць», — пажартаваў комік.
Пасьля гэтага Мірзалізадэ пачалі вінаваціць у русафобіі. 27 ліпеня гумарыст паведаміў, што яго пабілі ў цэнтры Масквы. 9 жніўня коміка арыштавалі на 10 сутак праз абвінавачваньне ва ўзбуджэньні нянавісьці.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG