Лінкі ўнівэрсальнага доступу

Украіна рассакрэціць матэрыялы пра баі ў «Ілавайскім катле» на Данбасе


Эпізод бою пад Ілавайскам на Данбасе, 26 жніўня 2014 г.

Генэральная пракуратура Ўкраіны рассакрэціць матэрыялы крымінальнай справы пра баі пад Ілавайскам на ўсходзе Ўкраіны ў 2014 годзе. Тады буйная група ўкраінскіх войскаў апынулася ў акружэньні і пры спробе прарвацца панесла цяжкія страты.

Падчас сустрэчы з сваякамі загінулых і зьніклых бязь вестак у «Ілавайскім катле» генэральная пракурорка Ірына Венядзіктава заявіла, што «грамадзтва павінна ведаць праўду» пра тыя падзеі. Матэрыялы крымінальнай справы аб баях пад Ілавайскам апублікуюць у спэцыяльным разьдзеле на сайце офісу генэральнага пракурора.

У ходзе расьсьледаваньня дапыталі больш за 900 пацярпелых і сьведкаў, дасьледавалі больш за 1600 дакумэнтаў. Матэрыялы справы складаюць больш за 300 тамоў, зь якіх больш за 70 з грыфам абмежаванага доступу.

Як расказала Венядзіктава, расьсьледаваньне ідзе ў двух кірунках. Па-першае, пракуратура расьсьледуе «ўварваньне расейскіх войскаў» і забойства ўкраінскіх вайскоўцаў. Па-другое, ідзецца пра магчымую нядбайнасьць з боку ўкраінскага вайсковага кіраўніцтва.

Падазраванымі ў справе праходзяць намесьнік начальніка Генэральнага штабу УС Расеі і былы начальнік галоўнага ўпраўленьня Генэральнага штабу УС Расеі, які цяпер займае пасаду намесьніка міністра абароны Расеі. Таксама падазраванымі прызналі двух расейскіх генэралаў: іх вінавацяць у замаху на тэрытарыяльную цэласнасьць і недатыкальнасьць Украіны, а таксама ў парушэньні законаў і звычаяў вайны, сумешчаным з наўмысным забойствам.

У сярэдзіне жніўня 2014 году ўкраінскія войскі, якія складаліся пераважна з добраахвотнікаў, здолелі адбіць ад прарасейскіх сэпаратыстаў горад Ілавайск у Данецкай вобласьці. Аднак 24 жніўня апынуліся ў акружэньні і панесьлі цяжкія страты. Паводле афіцыйных зьвестак, у так званым «Ілавайскім катле» загінулі 366 украінскіх вайскоўцаў і добраахвотнікаў, сотні параненыя. Улады Ўкраіны заявілі, што ў баях удзельнічалі рэгулярныя падразьдзяленьні расейскай арміі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG