Лінкі ўнівэрсальнага доступу

На БелАЭС пачалі пусканаладачныя работы на другім энэргаблёку


Беларуская АЭС у Астраўцы, ілюстрацыйнае фота

Ключавы этап пусканаладачных работ — гарачая абкатка рэактарнай устаноўкі пачалася на другім энэргаблёку БелАЭС, паведаміла Мінэнэрга Беларусі.

«У працэсе гарачай абкаткі спэцыялісты правераць працаздольнасьць асноўнага абсталяваньня энэргаблёку на адпаведнасьць патрабаваньням праектнай дакумэнтацыі, уключаючы адпаведнасьць нормам бясьпекі пры эксплюатацыі», — гаворыцца ў паведамленьні.

У рамках абкаткі асноўнае і дапаможнае абсталяваньне рэактара выпрабоўваецца пры працоўных парамэтрах — тэмпэратура цепланосьбіту першага контуру рэактарнай устаноўкі дасягае 280 градусаў, ціск — 160 атмасфэр.

Беларусь завяршае будаўніцтва АЭС побач з горадам Астравец у Горадзенскай вобласьці. Узводзяць яе за кошт расейскага крэдыту і па расейскім жа праекце ВВЭР-1200.

АЭС у Астраўцы запрацавала 7 лістапада 2020 году, тады ж Лукашэнка назваў Беларусь «ядзернай дзяржавай». З таго часу АЭС неаднаразова спынялася. Праўда, першы энэргаблёк знаходзіўся на этапе досьледна-прамысловай эксплюатацыі. 12 ліпеня першы энэргаблёк быў адключаны ад сеткі аўтаматычнай абаронай генэратара, плянуецца зноў падключыць яго да энэргасыстэмы ў сярэдзіне жніўня. Цяпер на першым энэргаблёку праводзіцца рэвізія і дыягностыка абсталяваньня турбагенэратара.

19 красавіка 2021 году на БелАЭС даставілі ядзернае паліва для другога энэргаблёку, які плянуюць запусьціць у першым паўгодзьдзі 2022 году.

Што варта ведаць пра БелАЭС

  • Беларуская АЭС ад 2011 году ўзводзілі пад Астраўцом, што ў Горадзенскай вобласьці, за 22 км ад мяжы зь Літвой, за 50 км ад Вільні і за 125 км ад Менску.
  • Тэрміны запуску некалькі разоў пераносілі. Першапачаткова запуск плянаваўся на 2018 год, Лукашэнка пазьней заяўляў, што тэрміны сарвала Расея. Урэшце цырымонія запуску АЭС прайшла 7 лістапада 2020 году.
  • Для будаўніцтва абраны праект АЭС-2006 — тыпавы расейскі праект атамнай станцыі новага пакаленьня з выкарыстаньнем вода-вадзянога энэргетычнага рэактара ВВЭР-1200. Паводле такога ж праекту збудаваныя блёкі Новаваронескай АЭС і Ленінградзкай АЭС-2, што працуюць у Расеі.
  • БелАЭС будуе расейская дзяржаўная кампанія «Росатом» за кошт крэдыту Расеі. Беларусь пазычыла да 10 млрд даляраў для фінансаваньня 90% кошту будаўніцтва двух энэргаблёкаў АЭС. Пагашэньне крэдыту пачынаецца праз 6 месяцаў з даты ўводу АЭС у эксплюатацыю, але не пазьней за 1 красавіка 2021 году. Беларусь просіць Расею падоўжыць крэдыт на 10 гадоў.
  • На станцыі будуць два энэргаблёкі з рэактарамі ВВЭР-1200 (В-491) магутнасьцю да 1200 МВт кожны. То бок праектная магутнасьць АЭС — 2,4 тысячы МВт. Калі АЭС запрацуе на поўную магутнасьць, станцыя дасьць 18 мільярдаў кіляват-гадзін на год — палову таго, колькі цяпер спажывае Беларусь.
  • Літва ня раз ставіла пад сумнеў абраньне для будаўніцтва АЭС астравецкай пляцоўкі. Краіна называла 10 прычын, каб не будаваць БелАЭС, абвінавачвала беларускія ўлады ва ўтойваньні інфармацыі пра станцыю. Літва пратэстуе супраць БелАЭС на найвышэйшым дзяржаўным узроўні, выказвае пратэсты ў міжнародных структурах. Літву падтрымлівае прэзыдэнтка Эстоніі.
  • Пляцоўка Астравецкай АЭС была прызнаная небясьпечнай яшчэ ў 1993 годзе. Тады было знойдзена 7 прыдатных пляцовак, 15 умерана прыдатных і 6 непрыдатных. Астравецкая пляцоўка трапіла ў лік апошніх.
  • Улады і чыноўнікі Беларусі нясьпешна рэагуюць на паведамленьні пра інцыдэнты на будаўніцтве ўласнай атамнай станцыі. Звычайна пра здарэньні на БелАЭС афіцыйна расказваюць пасьля таго, як зьвесткі пра іх зьяўляюцца ў СМІ — так, пра падзеньне корпуса рэактара расказалі толькі пасьля міжнароднага ціску. Урэшце корпус, які ўпаў, замянілі (расейцы зьбіраюцца выкарыстаць яго на іншай АЭС). Новы выпадкова стукнулі аб слуп, але пашкоджаньняў ня выявілі, вырашылі не мяняць корпус другі раз.
  • Беларусь вырабляе дастаткова электраэнэргіі для ўласных патрэбаў і без АЭС, Літву і Эстонію можа падтрымаць Латвія (хоць і не зьбіраецца ўводзіць эмбарга), Польшча зьбіраецца будаваць уласную АЭС, гэтаксама як Фінляндыя.
  • Адпрацаванае ядзернае паліва зь БелАЭС застанецца ў Беларусі. Эколягі сьцьвярджаюць, што Беларусь выбірае самы дарагі і небясьпечны спосаб захоўваць адпрацаванае паліва з АЭС.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG