Лінкі ўнівэрсальнага доступу

Хворы на дыябэт журналіст Андрэй Скурко — у СІЗА. Што вядома пра яго здароўе?


Андрэй Скурко

За кратамі ён за некалькі дзён моцна схуднеў, блізкія непакояцца за яго здароўе.

Кіраўнік аддзелу рэклямы і маркетынгу «Нашай Нівы» Андрэй Скурко 13 дзён правёў у жудасных умовах на Акрэсьціна: без матраца і падушкі, бязь зьменнай вопраткі, бяз сродкаў гігіены, безь перадач ад сваякоў — іх прынялі, але не перадалі, піша «Наша Ніва».

У 2017 годзе ў Скурко дыягнаставалі дыябэт 1 тыпу. Андрэй інсуліназалежны, чатыры разы на дзень ён павінен рабіць уколы. Супрацоўнікі Акрэсьціна прынялі ў сваякоў інсулін, але захоўвалі яго няправільна: на парозе душнай камэры.

Каб інсулін не губляў сваіх уласьцівасьцяў, яго трэба трымаць у халадзільніку пры тэмпэратуры +2°С — +8°С. Цяпер родныя Андрэя непакояцца, што інсулін мог проста сапсавацца, а ён крытычна неабходны арганізму.

Таксама Андрэю трэба некалькі разоў на дзень правяраць глюкомэтрам узровень цукру ў крыві. Прылада ў Андрэя ёсьць, але ў ёй сядае батарэя. Сваякі будуць перадаваць новую.

Вялікая праблема з харчаваньнем. Дыябэтыкам паказаная дыета з дазаваньнем вугляводаў. Але ўсе 13 сутак, паколькі перадачу ад родных Андрэю на Акрэсьціна не аддалі, ён быў вымушаны спажываць тое, што было — а гэта адны вугляводы. Мяса вобмаль, а гародніны, вітамінаў зусім няма.

Апроч таго, Андрэю паказана фізычная актыўнасьць, бо арганізм у гэты час выпрацоўвае інсулін. На волі ён стараўся хадзіць у дзень 7 тысяч крокаў, у камэры гэта рабіць няпроста.

Некалькі чалавек, якія бачылі Андрэя ўчора і заўчора, падкрэсьлілі, што ён моцна схуднеў і кепска выглядае.

Сьледзтву вядома пра стан здароўя Скурко. Нягледзячы на гэта, яго зьмясьцілі ў СІЗА.

Адрас для ліставаньня: СІЗА-1, 220030, г. Менск, вул. Валадарскага, 2. Скурко Андрэю Генадзевічу.

Таксама за кратамі знаходзіцца галоўны рэдактар «Нашай Нівы» Ягор Марціновіч. Галоўны рэдактар часопіса «Наша гісторыя» Андрэй Дынько напярэдадні некалькі гадзін быў на допыце ў Сьледчым камітэце. Яго адпусьцілі з ізалятара, але ён застаецца падазраваным па ч.2 арт. 216 КК (нанясеньне маёмаснай шкоды без прыкметаў раскраданьня).

8 ліпеня сілавікі затрымалі Ягора Марціновіча, Андрэя Дынько, Андрэя Скурко і галоўнага бухгальтара выданьня Вольгу Раковіч. Пасьля допыту ў Сьледчым камітэце іх як падазраваных паводле арт. 342 КК (арганізацыя ці рыхтаваньне дзеяньняў, што груба парушаюць грамадзкі парадак) зьмясьцілі на 10 дзён у ізалятар часовага ўтрыманьня на Акрэсьціна. Бухгальтарку вызвалілі 16 ліпеня.

Па сканчэньні 10 дзён іх затрымалі паўторна на тры дні як падазраваных ужо ў нанясеньні маёмаснай шкоды без прыкметаў раскраданьня (ч. 2 арт. 216 КК, караецца «хіміяй» ці калёніяй на тэрмін да 5 гадоў). Сэнс прэтэнзіяў у тым, што за камунальныя паслугі ў памяшканьні рэдакцыі плацілі паводле тарыфаў для фізычных асобаў, а трэба было — як для юрыдычных. Сьледчыя налічылі, што прадпрыемству «Мінэнэрга» нанесена шкода на суму 3,5 тысячы рублёў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG