Лінкі ўнівэрсальнага доступу

Лукашэнка назваў грамадзянку Расеі «асноўным мадэратарам» «сьпячай тэрарыстычнай ячэйкі». Што пра гэта вядома?


Ягор Дуднікаў. Архіўнае фота

Аляксандар Лукашэнка, расказваючы пра «атрады самаабароны», згадаў «грамадзянку Расеі Дуднікаву» як «асноўнага мадэратара гэтага дзейства». У Беларусі ў СІЗА ўжо амаль два месяцы знаходзіцца малады чалавек з такім прозьвішчам — Ягор Дуднікаў.

Маці і адвакат Ягора мяркуюць, што Лукашэнка абмовіўся і гаворка ішла менавіта пра яго, паведамляе Tut.by. Яны расказалі, што вядома пра справу і як цяпер адчувае сябе Дуднікаў Паводле іх інфармацыі, тэмпэратура ў камэры дасягала +50 градусаў, сам Дуднікаў называў умовы «Асьвенцімам».

Што за чат?

Паводле Лукашэнкі, у нейкім чаце людзі дамаўляліся аб дзеяньнях, накіраваных на гвалтоўную зьмену ўлады ў Беларусі. Удзельнікі чату называлі сябе «атрадамі самаабароны», паводле Лукашэнкі, гэта былі «сьпячыя тэрарыстычныя ячэйкі».

«Каардынатары — Літва, Польшча, ЗША, Украіна і ФРГ. І, увага, уладальнік чату — грамадзянін Нямеччыны спадар дэ Гофман, раней грамадзянін Расеі і Ўкраіны. Асноўны мадэратар гэтага дзейства — грамадзянін Расейскай… грамадзянка Расейскай Фэдэрацыі Дуднікава», — сказаў Лукашэнка.

У прамове Лукашэнкі прагучала жаночая прозьвішча, але ў беларускім СІЗА ўжо знаходзіцца мужчына з такой прозьвішчам — грамадзянін Расеі Ягор Дуднікаў. Яго маці і адвакат лічаць, што гаварылася менавіта пра яго — раней паведамлялася, што справа Дуднікава таксама зьвязаная з «атрадамі самаабароны».

Пазьней у эфіры тэлеканала АНТ заявілі, што Гофман (Дыз) і Ягор Дуднікаў зьяўляюцца адміністратарамі радыкальных тэлеграм-каналаў і куратарамі.

«Прапаганда гвалту, выхад на пратэсты, мэтадычкі вырабу „кактэйляў Молатава“, навучаньне пачаткоўцаў і каардынацыя ўдзельнікаў, некаторыя гатовыя падпальваць і падрываць», — казаў закадравы голас, а ў гэты час дэманстравалася фатаграфія Дуднікава.

Што за Дуднікаў?

20-гадовага Ягора Дуднікава затрымалі 5 траўня на кватэры, якую ён здымаў, правялі ператрус і выставілі абвінавачаньне ў прысутнасьці дзяжурнага абаронцы. Маці Ягора казала, што ён ня ўдзельнічаў у пратэстах, а ў Менск перабраўся жыць да каханай дзяўчыны. Ягор па прафэсіі кухар, але падпрацоўваў аматарскай агучкай мульцікаў, анімэ і рэклямных ролікаў.

Дуднікаў знаходзіўся ў СІЗА КДБ, 31 траўня хлопца перавялі ў СІЗА-1 на вуліцы Валадарскага ў Менску.

Што цяпер зь Ягорам Дуднікавым?

Паводле мамы і адваката, Дуднікаў скардзіцца на стан здароўя і цяжкія ўмовы ў СІЗА.

— На гэты момант я ведаю, што ягоны стан пагоршыўся: умовы надвор’я плюс наступствы пабіцьця пры затрыманьні вельмі нэгатыўна адбіліся на яго здароўі — там і пастаянныя галаўныя болі, і разьбіты зуб, які ўвесь час баліць, і панічныя атакі, усё гэта ёсьць у яго. І, на жаль, лекары не сьпяшаюцца дапамагаць зьняволеным, — расказпла ў эфіры «Дождя» Юлія Дуднікава, маці Ягора Дуднікава.

— Там [у СІЗА] немагчыма адчуваць сябе нармальна і добра, — паведаміў у эфіры «Дождя» адвакат Ягора Антон Гашынскі. — Пры анамальнай сьпякоце і вельмі дрэнным харчаваньні адразу ўзьнікаюць хваробы, у тым ліку зьвязаныя з разладам страўніка, а паколькі там вельмі дрэнная гігіена, то памыцца можна толькі раз на тыдзень і толькі 5–15 хвілін. Адпаведна, выконваць асабістую гігіену вельмі складана. Тым больш камэры, як правіла, перанаселеная, там утрымліваецца ад 4 да 15 чалавек.

Паводле Гашынскага, Дуднікаў скардзіцца на ежу ў СІЗА і дзякуе ўсім, хто шле яму пасылкі і перадачы.

— Яго вельмі ўразіла, што вельмі шмат добразычлівых людзей, якія бескарысьліва, бязвыплатна пасылаюць пасылкі, перадачы. Пасьля таго, як ён сказаў, што няма чым дыхаць, — вэнтылятар стаіць у камэры. І ты проста знаходзісься там [у камэры] голы, таму што рэчы намакаюць і нават знаходзячыся там голым ты пастаянна мокры.

Паведамленьне ад Дуднікова: «Чыста ГУЛАГ, але бяз катаргі»

Праз свайго абаронцу Дуднікаў перадаў «Новой газете» вуснае паведамленьне — пра тое, у якіх умовах ён утрымліваецца. Вось некаторыя цытаты:

«У СІЗА па-варʼяцку горача. А вэнтылятара няма. Апошні паверх і ад даху — чыста „Асьвенцім“! Дыхаць няма чым, і зь ежай бяда. Але перадачы ратуюць. Тэлевізара няма і няма наогул навінаў».

«Вельмі шмат пʼю. Ахоўнікі ставяцца нармальна, бо камэра „адукаваная“. Псыхолягу казаў шмат пра посттраўматычны сындром (пра бессань і пра галаўныя болі). Ад гэтага дрэнна цямлю. Псыхоляг паабяцаў пагаварыць з псыхатэрапэўтам, каб ён прыйшоў да мяне. Але да гэтага часу нікога няма. І так, зь ежай у нас тут дрэнна: няма чыстага посуду! Яго дрэнна мыюць ці ня мыюць наогул. Да таго ж бачыў, як яго ўпускаюць на падлогу, а потым у ім жа даюць ежу зьняволеным. Праз гэта, хто зьесьць з посуду, труціцца. Я атруціўся на трэці дзень заезду ў СІЗА (2021/06/02)».

«Сьпякота больш за 40 градусаў, усё хутка псуецца. Выклікаем лекара — ён можа ісьці тры дні. Чыста ГУЛАГ, але бяз катаргі!»

«Сусед з камэры цяпер не адчувае паху і смаку. Тыдзень яму было вельмі дрэнна. Але я трымаюся бадзёра! Толькі кашаль замучыў».

Ці ўдзельнічае Расея?

Ягор Дуднікаў — грамадзянін Расеі. Расейскі консул наведваў яго 2 чэрвеня. Тады ён паведаміў, што Дуднікаў «асаблівых скаргаў на ўмовы ўтрыманьня не выказваў», але перадаў «некалькі просьбаў». Таксама консул казаў, што «вядзецца праца па высьвятленьні ўсіх абставінаў».

— Я ведаю, што расейская амбасада робіць быццам бы ўсё, што можа. На жаль, мне цяжка меркаваць аб яе працы — я знаходжуся ў Расеі, а амбасада ў Беларусі. Але адвакат мяне запэўніў, што амбасада ўдзельнічае і робіць усё, што можа, — сказала маці Ягора. — Я са свайго боку пісала зварот у Міністэрства замежных спраў, зьвярталася да [старшыні Дзярждумы Расеі Вячаслава] Валодзіна, пісала на прамую лінію да Пуціна. Таксама стукаюся ва ўсе дзьверы і спрабую дамагчыся хаця б зьмякчэньня ўмоў утрыманьня для свайго дзіцяці.

Паводле яе, яна напісала заяву ў Сьледчы камітэт Беларусі з просьбай, каб сына перавялі пад хатні арышт — як гэта здарылася з Раманам Пратасевічам і Софʼяй Сапегай. Але пакуль не атрымала адказу.

Што сам Дуднікаў гаварыў пра сваю справу?

У пачатку чэрвеня Дуднікаў змог перадаць паведамленьне зь СІЗА, у якім заявіў, што яго пабілі пры затрыманьні і прымусілі агаварыць сябе.

«Сказалі, што калі не напішу, то мяне прызнаюць тэрарыстам і згнояць у турме, я ня ўбачу маму, сваю дзяўчыну. А калі напішу, то дэпартуюць у Расею і я ўсё забуду як страшны сон», — гаварылася ў яго паведамленьні.

Паводле паведамленьня, малады чалавек напісаў яўку з павіннай, паўдзельнічаў у відэадопыце, «дзе паўтараў завучаны тэкст», перадаў доступ да сваіх прыладаў. Аднак пасьля гэтага ня выйшаў на свабоду.

— Дуднікаў растлумачыў, што ён агаварыў сябе, гэтыя зьвесткі не зусім праўдзівыя, на яго аказвалася псыхалягічнае і фізычнае ўзьдзеяньне. Гэтыя дзеяньні былі абскарджаны ў КДБ і МУС Беларусі, — паведаміў «Дождю» яго адвакат Антон Гашынскі.

Паводле паведамленьня ад Дуднікава, ён толькі агучваў відэаролікі для тэлеграм-каналу «ОГСБ». «Тэксты даваў Дыз, адміністратар тэлеграм-каналу. Гэта рабіў за ўзнагароджаньне».

«Гэта тое ж самае, што пасадзіць у турму таксіста за тое, што ён падвёз апазыцыянэра. Ён чыста тэхнічны работнік, займаўся агучкай ролікаў, якія рабіла апазыцыя пасьля жнівеньскіх пратэстаў 2020 году», — казаў адвакат Гашынскі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG