Лінкі ўнівэрсальнага доступу

«Улады ня могуць прызнаць, што аблажаліся». Чаму суд у справе Ігара Лосіка робяць закрытым


Дар'я Лосік чытае ліст ад мужа. Архіўнае фота

Кансультанта Радыё Свабода Ігара Лосіка будуць судзіць на тэрыторыі гомельскага СІЗА №3. Ён за кратамі 355 дзён.

Палітвязьня, кансультанта Радыё Свабода Ігара Лосіка затрымалі ў яго дома ў Баранавічах 25 чэрвеня 2020 году. 15 чэрвеня 2021 году стала вядома, што суд па яго справе пачнецца амаль роўна праз год пасьля затрыманьня — 24 чэрвеня. Судзіць Ігара, а таксама Сяргея Ціханоўскага, Міколу Статкевіча і шэраг іншых палітвязьняў будуць на тэрыторыі СІЗА, а не ў абласным судзе Гомля, куды першапачаткова перадалі матэрыялы справы.

«Ігар лічыць, што суд пройдзе ў закрытым рэжыме і ў СІЗА зь дзьвюх прычын, — расказала пра рэакцыю Ігара Лосіка на навіну пра будучы працэс па яго справе жонка Ігара Дар’я. — Па-першае, улады баяцца вялікага зграмаджэньня людзей. І спрабуюць перашкодзіць гэтаму ўсімі магчымымі мэтадамі. Па-другое, адкрытасьць працэсу ўсім давяла б, што абвінавачаньні пустыя, а яго віна не даказаная».

Па словах Дар’і Лосік, Ігар даведаўся аб тым, што яго суд будзе праходзіць у СІЗА, раніцай 15 чэрвеня, яму прынесьлі ў камэру нейкі дакумэнт з інфармацыяй аб гэтым. Дар’я кажа, што пакуль ня ведае, як менавіта будзе адбывацца судовы працэс па справе яе мужа. Невядома, ці зможа сам Ігар прысутнічаць на нейкіх паседжаньнях, ці будзе ўвесь час заставацца ў камэры.

Дар’я пакуль таксама ня ведае, ці існуе хаця б тэарэтычная магчымасьць яе прысутнасьці на паседжаньнях. Яна зьбіраецца абмеркаваць магчымасьць накіраваньня хадайніцтва аб гэтым з адвакатам Ігара.

«Але я ў любым выпадку буду ў Гомлі падчас працэсу, каля СІЗА-3, — кажа Дар’я. — Як там што будзе адбывацца, я, на жаль, ня ведаю. Я абсалютна салідарная са сваім мужам, падзяляю яго погляд на прычыны закрыцьця працэсу. Адкрыты суд паказаў бы, што справа развальваецца, што за год ніякіх доказаў віны Ігара не было знойдзена. Яны ня могуць прызнаць сваю памылку, прызнаць, што яны аблажаліся. Адпаведна, суд павінен быць закрыты, каб ніхто нічога не даведаўся і не пачуў. Там зможа быць адвакат. І для іх было б лепш, каб я таксама была ў залі, а не ля сьценаў гомельскага СІЗА № 3».

Судовы працэс па справе Ігара Лосіка, Сяргея Ціханоўскага, Міколы Статкевіча і шэрагу іншых палітвязьняў пачнецца 24 чэрвеня. Ён будзе праходзіць у закрытым рэжыме на тэрыторыі СІЗА-3 Гомля.

Крымінальны перасьлед Ігара Лосіка

На адміністратара суполкі «РБ головного мозга» і фрылансэра-кансультанта Радыё Свабода Ігара Лосіка завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).

Лосіка затрымалі 25 чэрвеня 2020 года пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.

Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.

15 сьнежня пасьля выстаўленьня другога абвінавачаньня Ігар Лосік абвясьціў галадоўку пратэсту і трымаў яе да 25 студзеня.

11 сакавіка 2021 года Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.

Па якім артыкуле Лосіку выставілі новыя абвінавачаньні, невядома. Ягоны адвакат Дзьмітрый Лепрэтар пад падпіскай аб неразгалошваньні.

Дома Ігара чакаюць жонка і двухгадовая дачка. Жонка прыяжджала да месца закрытага суду і дзяжурыла каля будынку, нават ня маючы шанцаў зайсьці і пабыць на працэсе.

14 сьнежня ў будынку СІЗА-3 ў Гомлі судзьдзя Мікалай Доля вынес выракі 6 падсудным:

  • Ігару Лосіку прысудзілі 15 гадоў зьняволеньня,
  • Арцёму Сакаву — 16 гадоў,
  • Міколу Статкевічу — 14 гадоў,
  • Дзьмітрыю Папову — 16 гадоў,
  • Сяргею Ціханоўскаму — 18 гадоў,
  • Уладзімеру Цыгановічу — 15 гадоў зьняволеньня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG