Лінкі ўнівэрсальнага доступу

Да 15 сутак за «Першамай». Суды ў Менску і іншых гарадах

абноўлена

Пасьля шэрагу несанкцыянаваных акцыяў (і адной санкцыянаванай) на 1 Траўня адбыўся шэраг судоў над іх удзельнікамі.


Коратка

У Менску 2 траўня на 15 сутак арышту асудзілі сустаршыню БХД Паўла Севярынца і актывіста «Эўрапейскай Беларусі» Максіма Вінярскага, а ў Гомлі 15-суткавы арышт атрымаў намесьнік старшыні Аб’яднанай грамадзянскай партыі Васіль Палякоў. У Берасьці актывіста Ўладзімера Казлоўскага арыштавалі на 10 сутак за «акцыю чыстых аркушаў».

Актывістаў Інгу Абрамаву (Берасьце), Аляксея Самайлюка (Берасьце) і журналіста Яўгена Меркіса (Гомель) аштрафавалі на сумы ад 5 да 15 базавых велічынь.

Суды над блогерам Зьмітром Гарбуновым (Берасьце) і актывістам Аляксандрам Кабанавым (Берасьце) перанесьлі.

У сьпісе-пратаколе за акцыю 1 траўня ў Менску каля 10 чалавек. Сярод іх Уладзімер Някляеў, Юрась Губарэвіч, Марына Адамовіч, Вячаслаў Сіўчык, Славамір Адамовіч, Леанід Кулакоў, Аляксей Клюшнічэнка, Алена Талстая, Ніна Багінская. Чакаецца, што іх таксама будуць судзіць.

18:18 2.5.2017

Берасьце. За першатравеньскую «акцыю чыстых аркушаў» судзьдзя Алег Міранюк прысудзіў Інзе Абрамавай 230 рублёў штрафу. На сёньня ў Берасьці суды скончыліся.

18:05 2.5.2017

Берасьце. Судзьдзя Алег Міранюк прысудзіў Уладзімеру Казлоўскаму за «акцыю чыстых аркушаў» арышт на 10 сутак, а Аляксею Самайлюку — 345 рублёў штрафу за ўдзел у «акцыі чыстых аркушаў».

Аляксей Самайлюк сваёй віны не адмаўляў, ён сказаў, што сапраўды стаяў 1 траўня каля кінатэатру «Беларусь» у Берасьці, трымаючы ў руках чысты аркуш паперы.

Аляксей Самайлюк у судзе з чыстым аркушам паперы, зь якім быў на акцыі
Аляксей Самайлюк у судзе з чыстым аркушам паперы, зь якім быў на акцыі

Напачатку паседжаньня судзьдзя Міранюк забараніў фота- і відэаздымку і загадаў схаваць у кішэні мабільныя тэлефоны, бо «некаторыя непарадачна сябе паводзяць і ў інтэрнэце выкладваюць відэазапіс у парушэньне дазволу суду і кампрамэтуюць суд. Гэта што, нармальна?»

16:36 2.5.2017

Васіль Палякоў пакараны арыштам на 15 сутак

Гомель. Суд Савецкага раёну. Судзьдзя Алена Шайн на падставе двух адміністрацыйных пратаколаў пакарала намесьніка старшыні Аб’яднанай грамадзянскай партыі Васіля Палякова 15 суткамі арышту. Палітыка затрымалі 1 траўня на вуліцы Кожара пасьля мітынгу каля ДК таварыства «Віпра» за тое, што ён разгарнуў бел-чырвона-белы сьцяг. Мінулыя суткі Палякоў правёў у ізалятары часовага ўтрыманьня.

Васіля Палякова арыштавалі на 15 сутак за бел-чырвона-белы сьцяг

16:19 2.5.2017

Суд на блогерам Гарбуновым перанесьлі

Зьміцер Гарбуноў
Зьміцер Гарбуноў

Берасьце, Ленінскі раённы суд. Суд над блогерам Зьмітром Гарбуновым перанесьлі на сераду на 14.30. Судзьдзя Дзьмітрый Шурын задаволіў яго хадайніцтва аб адвакаце.

Гарбунова вінавацяць у непадпарадкаваньні міліцыянтам.

16:14 2.5.2017

Суд Аляксандра Кабанава ў Берасьці перанесьлі

Аляксандар Кабанаў
Аляксандар Кабанаў

Аляксандар Кабанаў заявіў хадайніцтва аб адвакаце, і судзьдзя Ларыса Назарэнка перанесла паседжаньне ў яго справе на заўтра, аб 11-ай гадзіне.

Аляксандра Кабанава вінавацяць ва ўдзеле ў несанкцыянаванай масавай акцыі.

16:01 2.5.2017

Паўла Севярынца пакаралі арыштам на 15 сутак

Севярынец пасьпеў сказаць судзьдзі «Вы не скарысталі свой шанец» і дадаў «Жыве Беларусь». Павал спадзяецца, што яго зьмесьцяць у іншую камэру, дзе няма вязьняў з вошамі.

Кажучы пра сакавіцкія падзеі, Севярынец назваў помстай і правакацыяй тое, што супраць яго склалі пратакол — улады, сказаў ён, зразумелі, што ў той сытуацыі перамаглі актывісты і неабыякавыя грамадзяне.

Пра падзеі 1 траўня Севярынец сказаў, што ня мог ня выйсьці на вуліцу. У тым ліку таму, што далучаецца да патрабаваньня аб адстаўцы Лукашэнкі, выступае супраць «дармаедзкага» дэкрэту і салідарызуецца з палітвязьнямі па справе «Белага легіёну».

Палітык удакладніў, што напярэдадні людзей пачалі хапаць пасьля завяршэньня акцыі. Яго затрымалі на выхадзе са станцыі мэтро «Пушкінская», на судзе ж праваахоўнікі казалі, што гэта была «Кастрычніцкая». Блытаныя паказаньні міліцыянтаў на судзьдзю не паўзьдзейнічалі. Як і той факт, што, як і раней, затрымлівалі без прад’яўленьня службовых пасьведчаньняў.

15:58 2.5.2017

У сьпісе-пратаколе за акцыю 1 траўня ў Менску каля 10 чалавек

У сьпісе-пратаколе ўдзельнікаў мітынгу, які бачыў Павал Севярынец, таксама пазначаныя Ўладзімер Някляеў, Юрась Губарэвіч, Марына Адамовіч, Вячаслаў Сіўчык, Славамір Адамовіч, Леанід Кулакоў, Аляксей Клюшнічэнка, Алена Талстая, Ніна Багінская... Чакаецца, што іх таксама будуць судзіць. Галіна Сіўчык, маці Вячаслава Сіўчыка, сказала, што каля пад’езду чакае аўтобус.

15:55 2.5.2017

15:38 2.5.2017

Міліцыянт сьведчыць пра ўдзел Севярынца ў абароне Курапатаў

На працэсе Паўла Севярынца ў судзе Цэнтральнага раёну Менску выступіў сьведка па эпізодзе ў Курапатах ад 3 сакавіка Вячаслаў Шкут, намесьнік начальніка адзела Савецкага РУУС. Згадаў, што каля будаўнічай пляцоўкі было вывешана 8 бел-чырвона-белых сьцягоў і расьцяжкі, якія заклікалі не дапускаць будоўлю і перашкаджаць будаўнікам.

«Севярынец удзельнічаў і праз гукаўзмацняльную апаратуру заклікаў перашкаджаць будаўнікам».

Сьведка пагадзіўся зь Севярынцам, што на момант 3 сакавіка будоўля была прыпыненая, удзельнікі несанкцыянаванай акцыі «сьвяткавалі перамогу», але — «усё роўна акцыя была недазволеная».

15:13 2.5.2017

Сьведкі заблыталіся, дзе затрымалі Севярынца

Другі сьведка на працэсе Паўла Севярынца ў судзе Цэнтральнага раёну Менску амапавец Іван Ломаш пацьвердзіў, што Севярынец быў на Кастрычніцкай плошчы, выступаў праз гукаўзмацняльнік. «Лічу, гэта было парушэньнем закону».

Сьведка сказаў, што затрымалі Севярынца на Кастрычніцкай плошчы: «Да вас падышлі і сказалі, каб вы прайшлі». Севярынец: «А вы ведаеце, што пасьля Кастрычніцкай плошчы мітынгоўцы прайшлі да плошчы Незалежнасьці, і я там быў? Што, вас не праінструктавалі?» Сьведка: «Не».

Сьведка настойвае на тым, што Севярынца затрымалі на Кастрычніцкай плошчы. Другі сьведка, Мікалаеў, таксама кажа пра месца затрыманьня: «Каля ўваходу ў пераход мэтро каля Кастрычніцкай плошчы».

Севярынец сьмяецца:

«Мяне затрымалі ў мэтро на „Пушкінскай“, значна пазьней. Я ўжо выходзіў з мэтро. І гэта зусім ня тыя людзі, якія мяне затрымлівалі.»

15:06 2.5.2017

Сьведка-міліцыянт: «Сабраліся незадаволеныя»

На працэсе Паўла Севярынца ў судзе цэнтральнага раёну Менску сьведчыць міліцыянт Яўген Мікалаеў, які быў на акцыі 1 траўня. Ён прыйшоў у суд у трэніровачным строі. Згадаў, як Севярынец выкрыкваў «Жыве Беларусь!» і «Баста!».

Судзьдзя спытала: «А ці вы зразумелі, супраць чаго выступалі мітынгоўцы?»

Сьведка думаў некалькі хвілінаў і сказаў. «Ну, сабраліся незадаволеныя...» Сьведка прызнаў, што асабіста ён не папярэджваў, каб разышліся, бо парушаюць закон.

14:53 2.5.2017

Севярынца судзяць адразу за два мітынгі

Паўла Cевярынца судзяць у судзе Цэнтральнага раёну Менску адразу па двух пратаколах. Судзьдзя Шабуня прапанавала яму даць паказаньні пра дзьве падзеі — акцыю 1 траўня і мітынг у Курапатах 3 сакавіка.

Павал Севярынец пагадзіўся. Кажучы пра падзеі 3 сакавіка, ён назваў помстай і правакацыяй уладаў тое, што супраць яго тады склалі пратакол:

«Бо на той дзень ужо стала вядома, што забудоўнік адмовіўся там будаваць, і людзі сабраліся, каб адзначыць гэтую падзею. Там сабралася каля 200 чалавек. Безумоўна, мы выступалі, безумоўна, пад бел-чырвона-белымі сьцягамі. Але што склалі за гэта пратакол — гэта правакацыя і помста ўладаў, якія адчувалі, што мы перамаглі ў той сытуацыі».

Пра падзеі 1 траўня Севярынец сказаў, што ня мог не прыйсьці на плошчу зь некалькіх прычынаў. У тым ліку таму, што далучаецца да патрабаваньня аб адстаўцы Лукашэнкі, што выступае супраць 3-га дэкрэту і каб выказаць салідарнасьць з палітвязьнямі, якія праходзяць па справе «Белага легіёну».

«Мы з поўным правам прайшліся па горадзе. Перад будынкам КДБ крычалі „Далоў КДБ!“, каб паказаць сваё абурэньне тымі правакацыямі, якія ладзіць КДБ. Увесь шлях, пакуль мы ішлі, побач ехалі аўтазакі, нас палохалі. Як акцыя скончылася, пачалі хапаць. Мяне схапілі ў мэтро, пасьведчаньняў не паказалі».

14:42 2.5.2017

Севярынец запатрабаваў адвод судзьдзі Шабуні

Павал Севярынец у залі Цэнтральнага суду Менску заклікаў судзьдзю Вікторыю Шабуню падаць рапарт аб звальненьні, «каб ня ўдзельнічаць у беззаконьні, якое цяпер твораць». Судзьдзя адказала: «Сядайце, калі ласка».

14:35 2.5.2017

Пасадзілі ў камэры да вашывых вязьняў, — Севярынец

Павал Севярынец распавёў, што на Акрэсьціна начаваў у камэры з 6 вязьнямі, у якіх былі вошы. Севярынец мяркуе, што яго наўмысна зьмясьцілі да гэтых арыштантаў.

14:28 2.5.2017

Пачаўся суд над Севярынцам

Менск. У Цэнтральным раённым судзе пачаўся працэс над сустаршынёй БХД Паўлам Севярынцам. Перад судом Павал распавёў, як яго затрымлівалі. Гэта было ў мэтро, на станцыі Пушкінская. Да яго падбеглі два супрацоўнікі і пацягнулі ў асобную каморку, нават супрацоўнікі мэтро зьдзівіліся. Адтуль вывелі да аўтобусу з АМАПам.

«Нават калі пасадзяць, гэта таго варта, бо беларусы не спужаліся, выйшлі на акцыю», — сказаў Севярынец пра магчымы адміністрацыйны арышт.

Пра тое, што будуць судзіць і за мітынг у Курапатах, Павал Севярынец сказаў:

«На гэтым месцы, дзе зьбіраліся будаваць офісны цэнтар, ужо прарасла трава, якую пасеялі гарадзкія службы. Улады самі прызналі, што абаронцы Курапатаў мелі рацыю, таму гэта проста абсурд, што судзяць за той мітынг».

13:39 2.5.2017

Севярынца будуць судзіць і за мітынг у Курапатах

Стала вядома, што Паўла Севярынца будуць судзіць за акцыю на 1 траўня і за мітынг у Курапатах, які адбыўся 3 сакавіка.

13:27 2.5.2017

Вінярскі абвясьціў галадоўку

Пасьля абвяшчэньня прысуду Вінярскі заявіў у зале суда, што абвяшчае галадоўку на знак нязгоды з судовым рашэньнем. Актывіст заявіў, што будзе галадаць увесь час адбыцьця адміністрацыйнага арышту.

13:11 2.5.2017

Вінярскі пакараны 15 суткамі арышту

Менск. Цэнтральны раённы суд пакараў актывіста апазыцыі Максіма Вінярскага 15 суткамі арышту.

Вырак вынес судзьдзя Міхаіл Хома. Максім Вінярскі прызнаны вінаватым ва ўдзеле ў несанкцыянаванай акцыі 1 траўня ў Менску.

12:08 2.5.2017

Вінярскі патрабуе адваката

Менск. Цэнтральны раённы суд. Максім Вінярскі выказаў адвод судзьдзі Міхаілу Хоме, сказаў, што не давярае яму, бо той неаб’ектыўны, але судзьдзя адвод адхіліў.

Цяпер у працэсе над Вінярскім абвешчаны перапынак, бо актывіст запатрабаваў адваката.

12:00 2.5.2017

Пачатак суду над Паўлам Севярынцам зацягваецца

Менск. Цэнтральны раённы суд. Паўла Севярынца вырашылі судзіць паводле яшчэ аднаго пратаколу, які мусяць прывезьці з Маскоўскага РУУС. Што гэта за пратакол, у судзе пакуль ня ведаюць. Калі пратакол прывязуць цягам паўгадзіны, суд адбудзецца да абеду, калі не пасьпеюць за гэты час, дык пасьля абеду. Гэта судзьдзя Шабуня сказала адвакату Севярынца.

Загрузіць яшчэ

Глядзець камэнтары (17)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG