Лінкі ўнівэрсальнага доступу

Менскі школьнік, які парэзаў настаўніцу, пакараны 8 гадамі зьняволеньня

абноўлена

У Менскім гарадзкім судзе абвешчаны прысуд гімназісту Данату Скакуну ў справе аб нападзе на настаўніцу.

Непаўналетні Данат Скакун прызнаны вінаватым у замаху на забойства з асаблівай жорсткасьцю. Суд прыгаварыў яго да пазбаўленьня волі на 8 гадоў.

Прысуд вынесла судовая калегія на чале з судзьдзёй Зінкевіч. Фота- і відэаздымкі ў судзе забаранілі, у тым ліку падчас абвяшчэньня прысуду.

Бацькі Даната Скакуна сказалі, што будуць абскарджваць прысуд, а ад камэнтару адмовіліся.

Пацярпелая Валянціна Губарэвіч не адказала на пытаньне, ці задаволеная яна прысудам. «На судзе я прасіла для Даната мінімальнага пакараньня», — сказала пацярпелая настаўніца. Паводле яе, у 74-й менскай гімназіі, дзе яна працягвае працаваць, выхаваўчы працэс наладжаны добра, а прычыну канфлікту з вучнем яна бачыць у сям’і.

Валянціна Губарэвіч
Валянціна Губарэвіч

На пытаньне Свабоды, ці было такое, каб бацькі вучняў гэтай клясы прасілі адміністрацыю школы замяніць ім настаўніцу расейскай мовы і літаратуры, Валянціна Губарэвіч адказала: не, такога не было.

Між тым падчас працэсу пра гэта казала маці Даната Скакуна карэспандэнту «„Комсомольской правды“ в Белоруссии». Пасьля прысуду дачка пацярпелай Дарʼя Губарэвіч скрытыкавала некаторых журналістаў за распаўсюд неправераных, на яе погляд, зьвестак пра сытуацыю ў клясе, дзе выкладала яе маці: «Вам павінна быць сорамна, а мы не маглі гэта зьняпраўдзіць, бо далі падпіску аб неразгалошваньні».

Калі ў Валянціны Губарэвіч пацікавіліся яе думкай пра тое, чаму вучань накінуўся на яе з нажом, пацярпелая не адказала і пайшла ад журналістаў.

Адвакатка пацярпелай Ганна Дакуцька мяркуе, што вынесены прысуд цалкам апраўдвае пацярпелую настаўніцу ў вачах грамадзтва. Пры гэтым адвакатка пагадзілася з тым, што непаўналетніх лепш не пазбаўляць волі: «Але 8 гадоў — мінімальны тэрмін па гэтым артыкуле», — зазначыла абаронца.

Данат Скакун падчас прысуду выглядаў спакойна, да прысуду размаўляў з бацькамі і ўсьміхаўся.

Журналістам пакуль невядома, якога пакараньня для падсуднага прасіла пракурор Вольга Герасімовіч. Ад камэнтару пасьля прысуду яна адмовілася.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG