Лінкі ўнівэрсальнага доступу

Лукашэнка: Выбары ў сакавіку — гэта падман нашых выбаршчыкаў


Менск, 2010

Кіраўнік Беларусі Аляксандар Лукашэнка выказаўся супраць правядзеньня прэзыдэнцкіх выбараў у сакавіку 2015 году.

Такая заява прагучала падчас прызначэньня кіраўнікоў мясцовых выканаўчых органаў 14 кастрычніка.

Лукашэнка заклікаў чыноўнікаў падвышаць выканаўчую дысцыпліну:

«Прынятае рашэньне — кропка. Калі ня выканана, то наступаюць іншыя патрабаваньні, аж да крымінальнай адказнасьці».

«Так будзе і далей, ня гледзячы на тое, будуць — ня будуць у нас выбары. На гэта арыентавацца ня трэба. Варта памятаць, што гэта экзамэн, і мы ўсе будзем здаваць гэты экзамэн. Але падладжвацца пад выбары, як мне прапаноўваюць (тут ужо ўсё пішуць, пачынаючы ад некаторых апазыцыянэраў), давайце правядзём не ў лістападзе наступнага году, як належыць, калі тэрмін канчаецца, а ў сакавіку, маўляў, цяпер абстаноўка адпаведная, рэйтынг у дзейнага прэзыдэнта ледзь не 90%, давайце правядзём. Гэта будзе падман нашых выбаршчыкаў і насельніцтва. Мы не павінны гэтага рабіць, тым больш падстаўляцца там, дзе ня трэба, пад крытыку.

Мы выйдзем да народа і скажам проста, што змаглі зрабіць. Што не змаглі — зробім. Хоча народ — няхай галасуе, ня хоча — ня трэба. Няхай абіраюць іншага чалавека. Павінна быць усё сумленна. На гэта трэба арыентавацца, настройвацца і не падладжвацца ні пад якія выбары. Жыцьцё павінна ісьці сваім парадкам. Мы павінны ў аснову нашай палітыкі пакласьці сумленнасьць і справядлівасьць. Больш нічога ня трэба. Паняцьці сумленнасьці і справядлівасьці сталі ўжо не псыхалягічнымі, а эканамічнымі», — адзначыў Лукашэнка.

Хоча народ — няхай галасуе, ня хоча — ня трэба. Няхай абіраюць іншага чалавека

Раней Лібэральна-дэмакратычная партыя Беларусі выступіла з ініцыятывай правесьці выбары вясной наступнага году. Сакратар ЦВК Мікалай Лазавік адзначыў агенцыі БелаПАН, што пакуль няма падстаў для гэтага.

У ЛДП патлумачылі сваю ініцыятыву тым, што гэта «аптымальная дата правядзеньня выбараў па многіх прычынах, і самае галоўнае — у гэты час удзел у выбарах прыме максымальная колькасьць выбаршчыкаў».

«Такая прапанова не супярэчыць заканадаўству, але павінны быць важкія падставы», — заявіў Лазавік. Ён падкрэсьліў, што тэрміны правядзеньня выбараў ўсталёўвае заканадаўства. «Як правіла, выбары і парлямэнта, і прэзыдэнта, і дэпутатаў мясцовых саветаў прызначаюцца дзесьці бліжэй да крайняй даты. Перанос у нас у гісторыі ажыцьцяўляўся на досыць вялікі пэрыяд — больш за месяц, было такое, — але для гэтага патрэбныя падставы. На сёньняшні дзень я такіх падстаў наогул ня бачу», — сказаў сакратар ЦВК.

Таму наступныя прэзыдэнцкія выбары, калі арыентавацца на патрабаваньні заканадаўства, павінны адбыцца восеньню 2015 году.

Глядзець камэнтары (3)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG