Лінкі ўнівэрсальнага доступу

Спытай што іншае


Чарговы раз узьнікла тэма геапалітычнага выбару беларусаў. Па дадзеных лябараторыі НОВАК на пытаньне “У якім саюзе лепш жыць Беларусі: з Расіяй ці з ЭЗ?”, у ліпені 2010 года 42,5% рэспандэнтаў назвалі Расію, 38,4% — ЭЗ. У чэрвені гэтыя лічбы былі адпаведна 43,1% і 32,5%.

Цікава, што другі гулец сацыялягічнага рынку, НІСЭПД, дае іншыя паказьнікі адказаў на тое самае пытаньне : 37,75% за саюз з Расіяй і і 38,9% за саюз з ЭЗ па выніках ліпеньскага апытаньня.

Ці не падаецца вам, што пытаньне, чыя актуальнасць была, напэўна ж, абгрунтаваная недзе ў сярэдзіне дзевяностых, сёньня выглядае як мінімум зьдзекліва ў дачыненьні да таго самага “народа”, да якога так “па-даросламу” апэлююць узброеныя сацыялягічнымі дадзенымі палітыкі, журналісты і навукоўцы?

Сацыёлягі апраўдваюцца тым, што мадэляваньне такой сытуацыі для рэспандэнтаў год пры годзе дае магчымасьць “ацаніць вэктар адпаведнага геапалітычнага выбару, гатоўнасьць да пераменаў у адпаведным накірунку”. Хто можа карэктна адказаць, калі і кім быў вызначаны гэты накірунак, у чым яго адпаведнасьць і адпаведнасьць -- чаму? У якой акрабатычнай паставе пытаньне пра саюз з саюзам дзяржаваў (ЭЗ) ці з асобнай дзяржавай (Расея) зьліваецца з фалічным сымбалем сувэрэнітэту, які ўрачыста дэманструюць пры любой нагодзе і надвор’і як дзяржаўныя, так і апазыцыйныя палітычныя сілы?

Ці ўсё ж комплекс геапалітычнай, а з ёю і эканамічнай, культурнай і нават настроевай залежнасьці ўкаранёны настолькі моцна, што мы не можам нават уявіць сабе, як гэта Беларусь “ня хоча замуж”?

Спрабую ўявіць сабе, як такое пытаньне было б сфармуляванае для жыхароў, напрыклад, Нарвэгіі: “ У саюзе з якой краінай вы хацелі б жыць: Даніяй ці Швэцыяй?” І на падставе адказаў былі б зробленыя высновы аб “прадацкіх” ці “прашведзкіх” настроях нарвэжцаў?

Шчыра прызнаюся, што я б стала ў тупік, калі б давялося адказваць мне самой. Нас нехта ўжо паклікаў у Эўразьвяз? Ці нашыя шматгадовыя адказы на пытаньне, ці хочам мы жыць у саюзе з Расіяй, неяк паўплывалі на існаваньне СНД? АДКБ? ЭўрАзЭС? Ці можа пад саюзам з Расіяй маецца на ўвазе “магутная Беларусь ад Брэста да Ўладзівастока?”

Але моцна цешыць тое, што нягледзячы на сфакусаваныя высілкі зручна раскласьці грамадзкую думку ў адпаведнасьці з ўяўленьням тых, хто будуе свой палітычны рэсурс на “народным меркаваньні”, колькасьць рэспандэнтаў, якія ўпарта адмаўляюцца выбіраць найменшую з двух горасьцяў, застаецца нязьменнай – каля 25%. А аналітыка НІСЭПД кажа нават, што амаль палова апытаных наўпрост ці ўскосна адмаўляецца выбіраць паміж тым ці іншым саюзам, ды яшчэ пры больш разгорнутым мадэляваньні выяўляецца, што палова апытаных гатовая ў такіх умовах пагадзіцца і з адным, і з другім.

Чамусьці я думаю, што гэтыя 25% найбольш пэрспэктыўная і самастойная частка грамадзтва, якая абараняе сябе ад рызыкі быць укрыжаванай дзеля сымбалізацыі геапалітычнага выбару беларусаў.


Глядзець камэнтары (8)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG